कलाशैली संवाददाता । डेब्यु निर्देशक नवीन चौहानद्वारा निर्देशित नेपाली फिल्म ‘ऊनको स्वीटर’ को विशेष प्रिमियर काठमाडौंमा सम्पन्न भएको छ । प्रिमियरमा उपस्थित निम्तालु सेलिब्रेटीले फिल्मको विषयवस्तु, कर्णप्रिय संगीत र कलाकारहरूको जीवन्त अभिनयको खुलेर प्रशंसा गरेका छन् ।
फिल्म हेरेपछि प्रतिनिधिसभाकी उपसभामुख इन्दिरा राना मगरले ‘ऊनको स्वीटर’ ले युवा पुस्तालाई साँचो प्रेमको महत्व सिकाउने बताइन् । उनले भनिन्, ‘यस फिल्मले दुई आत्माबीचको पवित्र प्रेमलाई दर्शाएको छ । पछिल्लो समय युवतीहरूसँग जोडिएका अप्रिय घटनाहरू आवेग र अमर्यादित हुने गरेका छन्, तर यो फिल्मले केटीहरूको मन कसरी जित्न सकिन्छ भन्ने सुन्दर तरिकाले प्रस्तुत गरेको छ।’
विविधताले भरिएको समाज र मानवीय सामीप्यता फिल्मको मुख्य आकर्षण रहेको उनको भनाइ थियो । त्यसैगरी, प्रतिनिधिसभाकी सांसद सोविता गौतमले फिल्मले उनलाई आफ्नो बाल्यकालको समयमा फर्काएको बताइन् । फिल्म छायांकन गरिएको रमणीय स्थान, बुनिएको मार्मिक कथा र कलाकारहरूको उत्कृष्ट अभिनयले दर्शकलाई तृप्त बनाउने उनको धारणा थियो । ‘यसले अन्य फिल्मभन्दा फरक ढंगले अल्पसंख्यक समुदायलाई बहुमतले कसरी प्रभाव पार्छ भन्ने देखाएको छ, जुन निकै भिन्न छ । त्यो तल्लो जाति वा माथिल्लो जाति हुनुले फरक पार्दैन’, उनले थपिन्।
अभिनेता दयाहाङ राईले ‘ऊनको स्वीटर’ ले दर्शकको आँखालाई शीतलता प्रदान गर्ने प्रतिक्रिया दिए । फिल्मको गीत जस्तै न्यानो र शान्त रहेको उनको अनुभव थियो । अभिनेता विपिन कार्कीले प्रिमियरमा सहभागीहरूबाट पाएको सकारात्मक प्रतिक्रियाले आफूलाई उत्साहित बनाएको बताए । उनले नियमित प्रदर्शनमा पनि यस्तै प्रतिक्रिया पाउने आशा व्यक्त गरे ।
अभिनेत्री मिरुना मगरले ‘ऊनको स्वीटर’ मा काम गर्दा आफूले एउटा भिन्न संसारमा नयाँ जीवन जिउने अवसर पाएको बताइन् । ‘आजको प्रतिक्रियाले मेरो मेहनतको फल पाएको महसुस भएको छ । मैले आफूभन्दा बिल्कुलै फरक किसिमको जीवनलाई जिएँ, यसका लागि निर्देशक नवीनजीलाई धेरै धन्यवाद’, उनले भनिन् । निर्माणको क्रममा उनले निकै रमाइलो अनुभव गरेको पनि बताइन् ।
आर्टमाण्डू प्रा.लि.को प्रस्तुति रहेको ‘ऊनको स्वीटर’ मा विपिन कार्की, मिरुना मगर, परीक्षा लिम्बु, एलेक्स पारस र विल्सन विक्रम राई मुख्य भूमिकामा छन्। साथै, सुनिल पोखरेल, माओत्से गुरुङ, प्रेम सुब्बा, सुरज तमु, शारदा देवी सिलवाल र भावना खपाङ्गी मगर लगायतका अनुभवी कलाकारहरूको पनि सशक्त अभिनय देख्न सकिन्छ ।
फिल्ममा समावेश सुजन चापागाईँ र झुमा लिम्बुद्वारा निर्देशित ‘फूल’, ‘मखमली’ र ‘काफ्ले’ जस्ता गीतहरूले यसअघि नै दर्शकमाझ लोकप्रियता हासिल गरिसकेका छन् । निर्देशक नवीन चौहानको यो पहिलो फिचर फिल्म हो । ‘ऊनको स्वीटर’ को कथा पूर्वी नेपालको पाँचथरदेखि भारतको वेस्ट बङ्गालको सीमासम्म फैलिएको छ।
तस्बिरहरू : कुवेर डंगोल
