कलाशैली संवाददाता । चलचित्र विकास बोर्डअन्तर्गत रहेको चलचित्रकर्मी कल्याणकारी कोषले बिरामी तथा दिवंगत भएका फिल्मकर्मीहरुलाई आर्थिक सहयोग प्रदान गरेको छ । कोषले तीन जना गम्भीर बिरामी र एक जना मृतक फिल्मकर्मिको परिवारलाई आर्थिक सहायता उपलब्ध गराएको बोर्डका अध्यक्ष दिनेश डिसीले जानकारी दिएका छन् ।
उहाँका अनुसार, मस्तिष्कमा रक्तस्राव भई ग्रिनसिटी अस्पतालमा उपचार गराइरहेका निर्देशक सन्तोष ढकालको परिवारलाई १ लाख रुपैयाँ आर्थिक सहयोग प्रदान गरिएको छ । त्यसैगरी, दिवंगत प्राविधिक श्रीकृष्ण तिमल्सिनाको काजक्रिया खर्चका लागि उनको परिवारलाई ५० हजार रुपैयाँ उपलब्ध गराइएको छ । खुट्टा भाँचिएर आराम गरिरहेका कलाकार गोकुल सुवेदीलाई ४० हजार रुपैयाँ र जटिल रोग सिरोसिसबाट पीडित प्राविधिक उमेश श्रेष्ठको परिवारलाई १ लाख रुपैयाँ आर्थिक सहायता प्रदान गरिएको छ ।
बोर्डका अध्यक्ष डीसी, कल्याणकारी कोषकी अध्यक्ष वसुन्धरा भुसाल, सदस्यहरु मोहन निरौला र पुष्कर लामासहितको टोलीले बिरामीहरुको निवास, अस्पताल र मृतकको क्रियापुत्री भवनमा पुगेर उक्त सहयोग रकम हस्तान्तरण गरेका थिए । फिल्मकर्मीहरूले एकआपसमा देखाएको यो सहयोग र सद्भावले सकारात्मक सन्देश दिएको छ ।
