कलाशैली संवाददाता । रङ्गमञ्चमा सन् १९८७ मा ‘भस्मासुरको नली हाड’ नाटकबाट अभिनय यात्रा सुरु गरेका अभिनेता सरोज खनाल ८ वर्षको अन्तरालपछि रङ्गमञ्चमा फर्किने भएका छन् । थापागाउँस्थित मण्डला थिएटरको विसं २०८२\०८३ सालको योजनाबारे जानकारी दिन सोमबार आयोजित पत्रकार सम्मेलनमा अभिनेत्ता खनालले रङ्गमञ्चमा भव्य पुनरागमन गर्न लागेको जानकारी दिए ।

उनले भने,‘मैले अभिनय यात्राको सुरुआत रङ्गमञ्चबाट नै गरेको हुँ । अमेरिकाको बसाईपछि नेपाल फर्किदा पनि फिल्म भन्दा अगाडी नाटक नै गरें । अहिले पनि पुनः आठ वर्षपछि नाटकमा फर्किएको छु ।’

उनले उक्त नाटक मण्डला नाटकघरमा आगामी दुई महिनाभित्र मञ्चन हुने जानकारी दिए । सोमनाथ खनालले निर्देशन गर्ने नाटकमा अभिनेता खनालसँगै सरिता गिरी, सरस्वती चौधरी, शुशाङ्क मैनाली लगायतका कलाकारले अभिनय अभिनय गर्नेछन् ।