कलाशैली संवाददाता । अभिनेता विपिन कार्कीले आफ्नो नयाँ फिल्म ‘ऊनको स्वीटर’ खास रहेको बताएका छन् । उनले फिल्मको आयोजित पत्रकार सम्मेलनमा आफूले अभिनय यात्रालाई स्मरण गर्दा उत्कृष्ट पाँच फिल्ममा ‘ऊनको स्वीटर’ ले स्थान बनाउने विश्वास व्यक्त गरे ।
उनले भने, ‘यसको व्यावसायिक सफलता कस्तो होला, अहिले नै भन्न सक्दिनँ । तर, हामीले उठाएको विषयवस्तु र यसको निर्माण शैलीले यो वर्षौंसम्म जीवन्त रहने फिल्म बनेको छ । यो नयाँ पुस्ताका लागि ग्रामीण जीवनको एउटा महत्वपूर्ण दस्तावेज पनि हुनेछ ।’
यसअघि ‘जात्रा’, ‘हरि’, ‘नाका’ र ‘सेल्फी किङ’ जस्ता चलचित्रहरूमा निर्वाह गरेका पात्रहरू पनि आफ्ना लागि विशेष रहेको उनले स्मरण गरे । ती फिल्मको व्यावसायिक पाटोभन्दा पनि त्यसको कलात्मक पक्षले आफूलाई आकर्षित गरेको उनको भनाइ थियो ।
फिल्मको कथावस्तुबारे जानकारी दिँदै अभिनेता कार्कीले ‘गुरुङसेनी’ युवती र ‘काफ्ले ब्राह्मण’ युवकबीचको प्रेम सम्बन्धमा आउने जातीय द्वन्द्वलाई प्रस्तुत गरिएको बताए । यसमा अभिनेता कार्कीको जोडीको रूपमा अभिनेत्री मिरुना मगर देखिएकी छन् । उनले फिल्ममा ‘फूल’ नामक एक स्पष्टवक्ता र परिणामको नसोच्ने युवतीको भूमिका निर्वाह गरेको जानकारी दिइन् ।
निर्देशक नवीन चौहानले फिल्मको नाम जस्तै यसको कथा पनि कोमल रहेको बताए । उनले साङ्गीतिक श्रव्यदृश्यहरूमार्फत विभिन्न कथाहरू प्रस्तुत गर्दै आएको अनुभवले नै फिल्म निर्देशन गर्न आफूलाई प्रेरित गरेको बताए ।
‘ऊनको स्वीटर’ मा पूर्वी नेपालको सुन्दर प्राकृतिक दृश्य र स्थानीय संस्कृतिलाई देख्न पाइने जानकारी दिइएको छ । पाँचथर जिल्लामा छायाङ्कन गरिएको यस फिल्ममा परीक्षा लिम्बू, विल्सनविक्रम राई, सुनिल पोखरेल, माओत्से गुरुङ, प्रेम सुब्बालगायतका कलाकारहरूको पनि अभिनय रहेको छ । निर्माण पक्षका अनुसार यो फिल्म यही वैशाख २६ गते नेपालसँगै विदेशमा पनि प्रदर्शन हुने तयारीमा छ ।
