कलाशैली संवाददाता । डान्स इन्डिया डान्स लिटिल मास्टर्स सिजन ३ की विजेता तौरिया फौज मगरले फिल्मबाट पनि उस्तै माया पाउने बताएकी छिन् । ‘नोरा फतेही लाइभ इन नेपाल’ कार्यक्रम बारे जानकारी दिन आयोजना गरिएको पत्रकार सम्मेलनमा तेरियाले आफू फिल्मका लागि तयार भएको बताइन ।
उनले भनिन्,’नृत्यमा पाएको जस्तै माया फिल्ममा पनि पाउने आशामा छु । मैले आफूलाई केही समयपछि यसको लागि तयार गरेकी हुँ । मेरो नेचर अनुसार म सफल नभएसम्म प्रयास भने गरी नै रहन्छु । यसमा पनि प्रयासमा छु, आगामी यात्रा राम्रो हुन्छ भन्ने लागेको छ ।’
उनले ‘मितज्यू’ नामक फिल्ममार्फत अभिनेत्रीको पहिचान बनाउँदै छिन् । यसअगाडि उनले ‘मेरो डान्स युनिभर्स’ नामक शो पनि होस्ट गर्दैछिन् । भारतीय अभिनेत्री नोरा फतेहीसँग स्टेजमा देखिने तेरियाले यो अवसरलाई सदुपयोग गर्ने बताइन ।
‘नोरासँग म एक कार्यक्रममा प्रतियोगीको रुपमा थिएँ । उहाँ अहिले विश्वभर चर्चित हुनुहुन्छ । उहाँमार्फत हामीले पर्यटन प्रवर्द्धनमा भूमिका निर्वाह गर्न सकिन्छ’, उनले भनिन् ।
