कलाशैली संवाददाता । विपिन कार्की र मिरुना मगरको शीर्ष भूमिका रहेको फिल्म ‘ऊनको स्वीटर’ को ट्रेलर मंगलबार सार्वजनिक गरिएको छ । काठमाडौंमा आयोजित पत्रकार सम्मेलनमा सार्वजनिक गरिएको करिब चार मिनेट लामो ट्रेलरमा कथा, पात्र र द्वन्द्वबारे प्रस्ट्याईएको छ ।
नवीन चौहान निर्देशित उक्त फिल्म पूर्वी नेपालको पहाडी भेगलाई पृष्ठभूमिमा राखेर तयार गरिएको हो । ट्रेलरले एउटा गुरुङसेनी युवती र ब्राह्मण युवकबीचको सरल प्रेम सम्बन्ध र त्यसमा देखिने जातीय अन्तर्विरोधलाई भावुक रूपमा प्रस्तुत गरेको छ । निर्देशक चौहानका अनुसार, फिल्मले मानवीय सम्बन्ध, सामाजिक भिन्नता र तीव्र भावनात्मक संवेदनालाई ग्रामिण परिवेशको यथार्थसँग गाँसेर चित्रण गर्ने प्रयास गरेको छ ।
फिल्ममा सुजन चापागाईं र झुमा लिम्बुको संगीत प्रयोग गरिएको छ, जसले ट्रेलरलाई थप प्रभावशाली बनाएको छ । कथा र संगीतको संयोजन ‘ऊनको स्वीटर’को विशेष पक्षका रूपमा उल्लेख गरिएको छ । ग्रामिण प्रेम कहानीलाई पुनः जीवन्त बनाएको अनुभव गराउने ट्रेलरमा अटोग्राफ साट्ने, नजरले भावना पढ्ने र सरल जीवनशैलीमा प्रेम गर्ने लगायत समेटिएको छ ।
फिल्ममा विपिन कार्की, मिरुना मगर, विल्सन विक्रम राई, परीक्षा लिम्बु, सुनिल पोखरेल, एलेक्स पारस, प्रेम सुब्बा, माओत्से गुरुङको लगायतको अभिनय रहेको छ । आर्टमाण्डूको ब्यानरमा बनेको ‘ऊनको स्वीटर’ आगामी वैशाख २६ गते (मे ९) देश तथा विदेशमा एकैसाथ प्रदर्शनमा आउने तयारीमा छ ।
