कलाशैली संवाददाता । फिल्मी क्षेत्रमा कुशल अभिनेत्रीको रेखा थापा अब रंगमञ्चमा पनि देखिन लागेकी छन् । कान्तिपुर थिएटरले मंचन गर्न लागेको नाटक ‘मीरा’ बाट उनले आफ्नो नाट्य डेब्यु गर्न लागेकी हुन् ।
दीपक सिंजालीको उपन्यास ‘मीरा’ मा आधारित यो नाटकको मुख्य भूमिकामा रेखा थापाले अभिनय गर्नेछिन् । हाल नाटकको रिहर्सल र रिडिङ कार्य सुरु भइसकेको छ । केही दिनअघि रेखाले सामाजिक सञ्जालमा ‘रेखा कि मीरा’ लेखिएको पोस्टसहित फोटो सेयर गरेर नयाँ यात्राको संकेत गरेकी थिइन् ।
‘मीरा’ नाटकमा एक महिलाले परिवार र समाजसँग गरेको विद्रोहको कथा प्रस्तुत हुनेछ । नाटकको नाट्य रुपान्तरण र निर्देशन सुन्दर धितालले गरिरहेका छन् । अन्य कलाकारहरूको सूची केही दिनभित्र सार्वजनिक गरिने कान्तिपुर थिएटरले जानकारी दिएको छ । यो नाटक जेठ १५ गतेदेखि असार ७ गतेसम्म मंचन हुनेछ । रेखा थापाको रंगमञ्चमा डेब्यु हुने भएकाले दर्शकमाझ नाटकप्रति विशेष चासो र प्रतीक्षा बढेको देखिन्छ । फिल्म शिक्षामा संलग्न कान्तिपुर फिल्म एकेडेमीले स्थापना गरेको उक्त थिएटरको शिलान्यास गत महिना अभिनेता राजेश हमालले गरेका थिए ।
