कलाशैली संवाददाता । दक्षिण भारतीय सुपरस्टार अल्लु अर्जुन र निर्देशक एटलीले मिलेर एक नयाँ साइन्स फिक्सन (साइफाइ) फिल्ममा काम गरिरहेका छन् । हाललाई ‘एए २२, ए सिक्स’ नाम दिइएको यो फिल्मलाई सन पिक्चर्सले छ सय करोड रुपैयाँभन्दा बढीको बजेटमा निर्माण गर्दैछ । हालै यसको निर्माण कार्यबारे विवरण सार्वजनिक भएपछि फिल्मप्रति व्यापक चर्चा सुरु भएको छ ।
यससँगै फिल्ममा अभिनेत्री मृणाल ठाकुरलाई अल्लु अर्जुनको अपोजिट मुख्य भूमिकाका लागि अनुबन्ध गरेको खबर भारतीय मिडियाले सार्वजनिक गरेका छन् । मृणालले मुम्बईको एक स्टुडियोमा लुक टेस्ट गराएकी थिइन् र फिल्ममा तीन महिला मुख्य पात्रमध्ये एकको भूमिकामा देखिनेछिन् ।
त्यस्तै, जान्हवी कपूर र दीपिका पादुकोणसँग अन्य दुई मुख्य भूमिकाका लागि पनि कुराकानी भइरहेको बताइएको छ । भारतीय मिडियाको रिपोर्टअनुसार जान्हवी लगभग फाइनल भइसकेकी छन् भने दीपिकासँग वार्ता जारी रहेको र चाँडै निर्णय हुनसक्ने जनाइएको छ ।
‘एए २२, ए सिक्स’लाई उच्च अवधारणामा तयार पारिएको फिल्मको रूपमा विकास गरिएको छ । भिएफएक्समा आधारित फिल्मले समानान्तर ब्रह्माण्डको कथा प्रस्तुत गर्नेछ, जहाँ अल्लु अर्जुनले आफ्नो करियरमा पहिलोपटक दोहोरो भूमिका निर्वाह गर्नेछन् । फिल्मको प्रि-प्रोडक्सन सुरु भइसकेको छ र यो वर्षको अगस्ट वा सेप्टेम्बरमा छायाङ्कन सुरु गर्ने लक्ष्य राखिएको छ ।
