कलाशैली संवाददाता । गायक दीपक लिम्बूको पहिलो स्वर्णीम सांगीतिक साँझ आगामी भदौ १७ गते काठमाडौँमा आयोजना हुने भएको छ । उनी बृहत् गायन प्रतियोगिता ‘नेपाली तारा’को विजेता बनेको २० वर्ष पूरा भएको अवसरमा कार्यक्रम आयोजना गर्न लागिएको हो । कमलादीस्थित नेपाल प्रज्ञा प्रतिष्ठानको हलमा साँझ ५ बजेदेखि सुरु हुने सांगीतिक साँझमा नेपाल संगीत तथा नाट्य प्रज्ञा प्रतिष्ठानका प्राज्ञ सदस्य अशोक लोहोरुङ राईले संगीत संयोजन गर्नेछन्।
साँझमा गायक लिम्बूले २५ जना लाइभ वाद्यवादकको टोलीसँग आफ्ना साथै अग्रज कलाकारका चर्चित गीतहरू प्रस्तुत गर्नेछन्। कार्यक्रमको टिकट दर १ हजार र ५०० रुपैयाँ तोकिएको आयोजकले जानकारी दिएको छ । सांगीतिक साँझको तयारीलाई लिएर गायक लिम्बू उत्साहित छन् । कार्यक्रम ओएस म्युजिकले आयोजना गर्न लागेको हो ।
विसं २०६२ सालमा ‘नेपाली तारा’ पहिलो संस्करणका विजेता बनेका लिम्बूले त्यसयता नेपाली चलचित्र र आधुनिक गीतमा लगातार लोकप्रियता कमाएका छन् । ‘मैले त्यही भएर मन पराको’, ‘यहाँ देशको छ चिन्ता’, ‘मुटु माग्यौ तिमीले’, ‘ढल्क्यो ढल्क्यो’, ‘मैले माया गर्न जानिनँ होला’ जस्ता उनका दर्जनौँ गीतहरू श्रोतामाझ लोकप्रिय छन् ।
