कलाशैली संवाददाता । नेपाली फिल्म क्षेत्रका अभिनेता आर्यन सिग्देलकी भान्जी आर्हीले संगीत यात्राको सुरुवात गर्दै ‘टक्सिक ट्रुथ’ नामक अङ्ग्रेजी गीत ल्याउने भएकी छन् । अभिनेता सिग्देलले गीतको पोस्टर सार्वजनिक गर्दै भान्जी आर्हीलाई नयाँ यात्राको लागि शुभकामना दिएका छन् ।
अष्ट्रेलियामा बसोबास गर्ने आर्हीले गायनमा रुचि राख्दै आएको बताइन्छ । लामो तयारीपछि उनले आफ्नो पहिलो गीत सार्वजनिक गर्ने तयारी गरेकी हुन् । अङ्ग्रेजी भाषामा तयार गरिएको ‘टक्सिक ट्रुथ’ मा गीत लेखनम आर्हीसँगै म्यागी एल बार्न्सको सहकार्य रहेको छ। गीतको सङ्गीत फोसिल र नेप्सेकले तयार पारेका छन्, जसले गीतलाई आधुनिक र अन्तर्राष्ट्रिय स्वाद दिने प्रयास गरिएको बताइएको छ ।
‘टक्सिक ट्रुथ’ को म्युजिक भिडिओ पनि पूरा भइसकेको छ । भिडिओलाई अनुभवि निर्देशक दीपेन्द्र केसीले निर्देशन गरेका छन् । एक दशकअघि म्युजिक भिडिओ निर्देशनमा निकै सक्रिय देखिएका केसी पछिल्लो समय डकुमेन्ट्री निर्देशनमा बढी केन्द्रित भएका छन् । तथापि, आर्हीको डेब्यु प्रोजेक्टलाई लिएर उनी पुनः म्युजिक भिडिओ निर्देशनमा फर्किएका छन् ।
भिडिओ निर्माणमा क्रिएटिभ निर्देशकको रूपमा दिनेश जंग राणाले भूमिका निर्वाह गरेका छन् भने छायांकन बाबु श्रेष्ठले सम्हालेका छन् । भिडियोको सम्पादन तथा पोस्ट-प्रोडक्सन कार्य ‘पोस्ट प्रो’ स्टुडियोमा भइरहेको छ । निकट भविष्यमै ‘टक्सिक ट्रुथ’ औपचारिक रूपमा सार्वजनिक गरिने तयारी गरिएको छ ।
