कलाशैली संवाददाता । नेपाली फिल्म जगतका अभिनेता राजेश हमालले पहिलो पटक ‘स्ट्याण्डअप कमेडी’ मा हात हालेका छन् । बेलायतको लन्डन ह्यारोमा आज साँझ हुने ‘लाफ्टर फर लाइफ’ कार्यक्रममा हमालले कलाकार सन्दीप क्षेत्रीसँग सहकार्य गर्दै ‘स्ट्याण्डअप कमेडी’ प्रस्तुति दिने भएका हुन् । कार्यक्रम अगाडि आयोजित पत्रकार सम्मेलनमा कलाकार क्षेत्रीले आफूहरू चार महिनादेखिको तयारीपछि प्रस्तुति दिन तयार भएको जानकारी गराए ।
‘राजेश दाइसँग नजिक भएर संवाद गर्नेहरूलाई थाहा छ, उहाँको ‘सेन्स अफ ह्युमर’ कति राम्रो छ । त्यसैले मैले कार्यक्रमको प्रस्ताव गर्दा उहाँ पनि नयाँ रुपमा प्रस्तुत हुन तयार हुनुभयो’, क्षेत्रीले भने ।
स्टेजमा सुरुमा सन्दीप क्षेत्रीले एक्लै प्रस्तुति दिनेछन्, त्यसपछि राजेश हमालले प्रस्तुत हुनेछन् र अन्त्यमा दुबैले संयुक्त रुपमा कार्यक्रम समेट्नेछन् । क्षेत्रीका अनुसार यो कार्यक्रम सफल भएपछि अन्य देशहरूमा पनि यस्तै प्रस्तुति गरिने योजना छ ।
कार्यक्रममा गायक नवीन के भट्टराई र उनको सांगीतिक समूह ‘अतृप्त’ले पनि गीतसङ्गीत प्रस्तुत गर्नेछन् । ‘लाफ्टर फर लाइफ’ कार्यक्रम बेलायतस्थित माया इभेन्ट्सले आयोजना गरेको हो ।
