कलाशैली संवाददाता । अप्रिल २२ मा भारतको कश्मीरस्थित पहलगाममा भएको आतंकवादी हमलापछि भारत-पाकिस्तान सम्बन्ध फेरि तनावग्रस्त बनेको छ ।हमलामा पाकिस्तानी आतंकवादीको संलग्नता रहेको दाबी गर्दै भारतले पाकिस्तानविरुद्ध कडा प्रतिक्रिया जनाएको छ । यस घटनापछि भारतमा काम गरिरहेका पाकिस्तानी कलाकारहरू पनि विवादको घेरामा परेका छन् । भारतीय फिल्म फेडरेसन (एफडब्लूआईसीई) ले पाकिस्तानी कलाकार, गायक र प्राविधिकहरूमाथि प्रतिबन्ध लगाउने निर्णय सार्वजनिक गरेको छ ।
एफडब्लूआईसीईका प्रमुख सल्लाहकार अशोक पण्डितले बुधबार जारी गरेको विज्ञप्तिमा अब कुनै पनि भारतीय कलाकार वा निर्माताले पाकिस्तानी कलाकारहरूसँग सहकार्य गर्न नपाउने स्पष्ट पारिएको छ । यस निर्णयको असर बलिउडमा पुनः फर्कने तयारीमा रहेका पाकिस्तानी अभिनेता फवाद खानमाथि पनि पर्नेछ । ‘अबीर गुलाल’ मार्फत बलिउडमा पुनः इन्ट्रीको तयारीमा रहेका खानले पहलगाम हमलाको विरोध जनाउँदै पीडितप्रति समवेदना व्यक्त गरेका छन् ।
उता, भारतमा निकै लोकप्रिय पाकिस्तानी अभिनेत्री हानिया आमिरले पनि सामाजिक सञ्जालमार्फत पीडितहरूप्रति सहानुभूति जनाएकी छन् । यद्यपि यी दुईको आउन लागेको फिल्मलाई प्रत्यक्ष असर पर्ने छ । भारतले पटक-पटक आतंकवादी हमलामा पाकिस्तानको संलग्नता रहेको भन्दै यस्ता कडा कदम चाल्दै आएको छ । पछिल्लो घटनासँगै द्विपक्षीय सांस्कृतिक सम्बन्धमा थप खटपट आएको देखिएको छ ।
