कलाशैली संवाददाता । फिल्म ‘खुस्मा’मा समावेश गीत ‘रुकुम मैकोट’ मा फिचर्ड जोडी धिरज मगर र उपासना सिंह ठकुरी फिल्म ‘जलाकी’ मा देखिने भएका छन् । कसैको सम्झना र मायाको प्रतिकको रुपमा मानिने ‘जलाकी’ मगर समुदायको आस्थाको प्रतिक ढुंगाले चिनेको स्तम्भलाई बुझाउँछ । अशोक थापा मगरको निर्देशनमा बन्ने फिल्ममा अभिनेता धिरजको प्रवेश भएसँगै उनीहरूले दोस्रो पटक सहकार्य गर्न लागेका हुन्।
फिल्मको पहिलो चरणको छायांकन केही दिनअघि बागलुङको कालिका मन्दिरबाट सुरु भई सकिएको निर्माण टिमले जानकारी दिएको छ । निर्देशक अशोकका अनुसार धिरज मगरले दोस्रो चरणको छायांकन सुरु भएपछि फिल्मको सेट जोइन गर्ने छन् ।
त्रिकोणात्मक प्रेम कथामा आधारित यो फिल्ममा धिरजसँगै सोनम तोप्देन, उपासना सिंह ठकुरी, अस्तित्व भट्टचन र आकृति राजभण्डारीको मुख्य भूमिका रहनेछ। मोडल आकृति राजभण्डारीको यो डेब्यु फिल्म हो । फिल्म तीन चरणमा रुकुम, म्याग्दी, बागलुङ, पोखरा र दक्षिण कोरियाका विभिन्न स्थानहरूमा फिल्म खिचिनेछ । फिल्मले मगर र गुरुङ समुदायको संस्कृति झल्काउने बताइएको छ ।
जलाकी एम मिडिया प्रालीको व्यानरमा निर्माण भइरहेको छ। फिल्मका निर्मातामा ओम घर्तीमगर, वीर बहादुर लामा, चन्द्र बहादुर भट्टचन, बेताने मगर (बबिता राना), मान बहादुर धनाह मगर र सुस्मिता बुढाथोकी रहेका छन् । फिल्ममा माओत्से गुरुङ, बुद्धि तामाङ, संगीता थापा मगर, राजु रेग्मी मगर, खड्क बहादुर पुन (खबपु) लगायतका कलाकारको पनि अभिनय रहनेछ । फिल्मको छायांकन शैलेन्द्र डी काकीले गरिरहेका छन् ।
