कलाशैली संवाददाता । निर्देशक वसन्त निरौलाले नयाँ फिल्म ‘पाँच पाण्डव’ निर्देशन गर्ने भएका छन् । काली रानी फिल्म्समार्फत निर्माण हुने फिल्मलाई ‘लाज शरणम्’का निर्माता नवीन श्रेष्ठले निर्माण गर्नेछन् । यसमा टेली सिरियलमा रुचाइएको जोडी सिताराम कट्टेल (धुर्मुस) र कुञ्जना घिमिरे (सुन्तली) लाई कलाकारका रुपमा तय गरेका छन् ।
यसका साथै नाम अनुसार फिल्ममा पाँच पात्र प्रमुख भूमिकामा रहने बुझिएको छ । निर्देशक निरौलाले बनाएको सोच अनुसार फिल्म निर्माण भएमा यो वर्षकै ठूलो फिल्म बन्ने छ,’पाँच पाण्डव’ । निर्देशक निरौलाले अहिले पटकथा लेख्नकै क्रम रहेको बताए ।
‘हामीले यही वर्ष छायांकन गरेर प्रदर्शन गर्ने सोच बनाएका छौँ । यो फिल्म मेरा लागि अवसर र चुनौती दुवै हो । यसलाई मैले निर्देशन करिअरकै महत्वाकांक्षी प्रोजेक्टको रुपमा लिएको छु’, निर्देशक निरौलाले भने ।
उनले पटकथा लेख्नकै क्रम र केही कलाकारसँग मौखिक संवाद भइरहेकाले अन्य कलाकारको बारेमा जानकारी दिन नमिल्ने बताए । साढे तीन करोड हाराहारीको लागतमा फिल्म बन्ने तय गरिएको भएता पनि यसमा रहने कलाकार अनुसारको यसको बजेट तय हुने निर्देशक निरौलाको भनाइ छ । निर्देशक निरौला ‘पाँच पाण्डव’ बनाउन कसिएपछि गत मङ्सिरमा घोषणा भएको उनको अर्को फिल्म ‘दशमी’ के होला भन्ने प्रश्न उब्जिएको छ । निर्देशक निरौला दुवै फिल्म पालैपालो बन्ने बताउछन् ।
‘फिल्मको कथा अनुसार कुन अगाडि वा पछाडि बन्छ भनेर तय हुन्छ तर दशमी बन्छ नै’, उनले भने । गत वर्षको फूलपातीमा उनको निर्देशनमा बनेको फिल्म ‘ज्वाइँ साब’ प्रदर्शन भएको थियो ।
