कलाशैली संवाददाता । कलाकारका लागि फिल्मी उडान भर्न पछिल्ला वर्ष रंगमञ्च गतिलो ट्रान्जिट भईरहेको छ । अभिनयमा निखारता ल्याउनका लागि केही समय थिएटरमा संघर्ष गर्ने, क्षमता देखाउने र गतिलो प्रोजेक्ट छनौट गरी फिल्ममा हाम फाल्ने प्रक्रिया अहिले नियमित जस्तो छ । रंगमञ्चबाटै फिल्ममा पनि सफल हुनेको ताँती अब केवल दयाहाङ राई वा सौगात मल्लमा मात्रै अड्किरहनु पर्दैन, पछिल्लो पुस्ताकै विजय बराल, नाजिर हुसेन, विपिन कार्कीहरुको पनि जबरजस्त उपस्थिती देखिएको छ । कलाकार बन्न चाहने धेरैका लागि दया, सौगात, विजय वा सरिता गिरी, पशुपति राई आदर्श हुन् भने रंगमञ्च प्लाटफर्म ।

सानैदेखि नै कलाकार बन्ने हुटहुटी बोकेर रंगमञ्च छिरेकी थिइन्, समापिका गौतम पनि । काठमाडौंको शैली थिएटरबाट कला यात्रा थालेकी समापिकाले झन्डै नौ वर्षको अवधिमा ‘कुरीकुरी’, ‘माधवी’, ‘चिसो भञ्ज्याङ’, ‘थ्री सिस्टर्स’, ‘द लिटल स्कूल’ जस्ता नाटकमार्फत् आफ्नो कला क्षमता देखाईसकेकी छन् । यतिबेला भने उनी ‘खेल’ मार्फत् फिल्ममा डेब्यू गर्दैछिन् ।

सस्पेन्स थ्रिलर जनराको नेपाली फिल्म ‘खेल’ आगामी शुक्रबार वैशाख १२ देखि देशभर प्रदर्शनमा आउने तयारीमा छ । नेपाली लोककथा, परम्परा, अध्यात्म र थ्रिलरको सम्मिश्रणमा आधारित यस फिल्ममा अध्ययनका लागि काठमाडौंको होस्टेलमा बसेका केही साथीसँग सम्बन्धित कथा प्रस्तुत गरिएको छ । फिल्ममा समापिकाले ईशा नामकी एक युवतीको भूमिका निर्वाह गरेकी छन् ।

समापिका ‘खेल’लाई आफ्नो अभिनय यात्राको महत्वपूर्ण मोड मान्छिन् । ‘मैले पर्दामा धेरै कलाकारलाई देख्दै हुर्किएकी हुँ । अब आफैंलाई त्यो पर्दामा देख्न पाउने भएपछि यसको अनुभूति शब्दमा भन्न गाह्रो छ’ समापिका भन्छिन् । पत्रकारिताकी विद्यार्थीसमेत रहेकी समापिकाले २०७६ मा आमसंचार तथा पत्रककारिताको स्नातक तहमा सर्वाधिक अंक समेत ल्याएकी थिइन् । अध्ययन र रंगमञ्चमा आफुलाई खरो उतारिसकेकी उनी फिल्ममा कत्तिको खरो उत्रने हुन्, वैशाख १२ पछि नतिजा आउने नै छ ।

अनुराग प्रधान र आस्था श्रेष्ठद्वारा निर्देशित ‘खेल’ सिरुपाते कट्स प्रालिको ब्यानरमा निर्माण भएको हो । लुइसराज महर्जन र आशिषराज महर्जन निर्माता रहेको यो चलचित्रमा सुरक्षा पन्त, मोनिका थापा, हेना नगरकोटी, निकिता आचार्य, मिथिला शर्मा, सरिता गिरी र भोलाराज सापकोटाको पनि अभिनय रहेको छ ।