कलाशैली संवाददाता । निर्देशक दिनेश राउतले ‘महाभोज’ मनोरञ्जनको प्याकेजसँगै दर्शकलाई सोच्न बाध्य बनाउने कथा रहेको बताएका छन् । फिल्मको दुई पोस्टर सार्वजनिक गर्दै निर्देशक राउतले नेपाली समाजको वर्ग सङ्घर्षलाई फिल्ममा प्रस्तुत गरिएको बताए । उनले भने,‘समाजमा भइरहेका घटनाक्रम र त्यसले जनताको जीवनमा पार्ने असरलाई यस फिल्ममा उजागर गर्ने प्रयास गरेको छु ।’
आउँदो जेठ १५ मा प्रदर्शन हुने फिल्म ‘महाभोज’ मा दयाहाङ राई, खगेन्द्र लामिछाने, अञ्जना बराइली, गौमाया गुरुङ, मलिका महत, आर्यन सिग्देल, वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, वीरेन्द्र सिंह कुशवाहलगायतका कलाकारहरूको अभिनय रहेको छ । सार्वजनिक दुवै पोस्टरहरू रोयल भीमसेनले डिजाइन गरेका हुन् ।
क्लक वर्क क्रियशन र पिक्चर फ्रेमको संयुक्त व्यानारमा निर्माण भएको फिल्मको कथा तथा पटकथा विकास सुवेदीले लेखेका हुन् ।
