कलाशैली संवाददाता । अभिनेत्री तथा मोडल नीति शाहले आफ्ना प्रेमी याञ्चित राणासँग कानूनी विवाह गरेकी छन् । शुक्रबार काठमाडौं जिल्ला अदालतमा उनीहरूले कोर्ट म्यारिज गरेका हुन् । न्यायाधीश दिनबन्धु बरालको इजलासमा विवाह सम्पन्न भएको हो । विवाहपछिको प्रतिक्रिया दिँदै नीतिले आफूले पहिल्यैदेखि तामझामबिनै विवाह गर्ने योजना बनाएको बताइन्।
याञ्चित राणा पेशाले एरोस्पेस इन्जिनियर हुन् । उनीहरू करिब दुई वर्षदेखि प्रेम सम्बन्धमा रहेका छन् । राणाले विगतदेखि नै नीतिसँगका रोमान्टिक तस्वीर सामाजिक सञ्जालमा साझा गर्दै आएका थिए ।
‘मिस नेपाल इन्टरनेशनल २०१७’ को उपाधि जितेकी नीतिले ‘खजुरे ब्रो’ फिल्ममार्फत अभिनय क्षेत्रमा डेब्यु गरेकी थिइन् । त्यसपछि उनले ‘ज्वाइँ साब’ मा अभिनय गरिन् । उनी अभिनित तेस्रो फिल्म ‘नरसिंह अवतार’ आउँदो जेठ ९ गतेबाट प्रदर्शनमा आउने तयारीमा छ ।
