कलाशैली संवाददाता । पछिल्लो समय पपस्टारले फिल्मको गीतमा स्वर दिने क्रम बढ्दो छ । गायक सुशान्त केसी, मिस्टर डी, जीबब लगायतका गायकपछि ‘मंगोलियन हार्ट’ सांगीतिक समूहका गायक राजु लामाले पार्श्व गयानमा स्वर दिएका छन् । उनले अशोक शर्माको आगामी निर्देशकीय कथानक फिल्म ‘डबल ट्रिपल’को लागि गीत रेकर्ड गराएका हुन् ।

यसअघि उनले सन् २००० मा फिल्म ‘आगो’को लागि सचिन सिंहको संगीतमा गीत गाएका राजुले लामो समयपछि पार्श्व गायनमा स्वर दिएका हुन् । झन्डै तीन दशकअघि रिलिज भएको फिल्म ‘ट्रक ड्राइभर’को गीत ‘सम्झना बिर्सना सललल’ को रिक्रिएट भर्सनमा राजुसँगै रचना रिमालले स्वर दिएका छन् । यसको ओर्जिनल भर्सनमा शम्भुजीत बासकोटा शब्द तथा संगीत रहेको गीतमा उदितनारायण झा र दीपा झाको स्वर थियो ।

नयाँ शैलीको गीतमा पनि सङ्गीतकार बाँस्कोटाले नै सङ्गीत संयोजन गरेका छन् । निर्माता तथा निर्देशक शर्माले गीतमा पुरानै मिठास पाइने बताए । उनी नयाँ र पुरानो दुवै पुस्तालाई हुने गरी गीत निर्माणमा जुटेका छन् । अभिनेता दयाहाङ राई, खगेन्द्र लामिछाने, मिरुना मगर, केकी अधिकारी, राजाराम पौडेल लगायतको अभिनयरहेको फिल्मको छायांकन बैशाख अन्तिमदेखि हुने तयारी छ ।