कलाशैली संवाददाता । गीतकार लोकराज अधिकारी ‘इन्टरनेशनल सिङ्गर सङ राइटर्स एसोसिएसन (इसा)’ ले हरेक वर्ष संयुक्तराज्य अमेरिकामा आयोजना गर्ने ‘इसा अन्तर्राष्ट्रिय अवार्ड’ को सातौँ संस्करणको दुई विधामा मनोनयनमा परेका छन् । गएको अप्रिल २ मा सार्वजनिक गरिएको मनोनयनमा नेपालबाट गीतकार अधिकारी ‘जिन्दगानी के छ र’ बोलको गीतबाट ‘वर्ष गीतकार पुरुष’ र ‘म्युजिक भिडिओ अफ द इयर’ गरी दुई विधामा मनोनयनमा पर्न सफल भएका हुन् । यो मनोनयन आफ्नो मात्र नभई नेपालकै प्रतिनिधित्व भएको गीतकार अधिकारीले बताए ।

‘म नेपालबाट एक्लो मनोनयनमा परेको छु, त्यसकारण मैले देशकै प्रतिनिधित्व गरेको महसुस भएको छ । उक्त अवार्डको सार्वजनिक मनोनयनमा अन्य देशसँगै नेपालको झण्डा देख्दा आफूले केही गरेको जस्तो महसुस भएको छ’, उनले भने ।

गीतकार अधिकारी लगातार दोस्रो वर्ष नेपालबाट मनोनयनमा परेका हुन् । अमेरिकाको २१ विधा र अन्तरार्ष्ट्रिय २१ विधा अन्तर्गत प्रतिस्पर्धा हुने अवार्डमा उनले गीतकार विधामा उहाँसँगै ६१ जना र ‘म्युजिक भिडिओ अफ द इयर’ तर्फ ३६ जना प्रतिस्पर्धा गर्दैछन् । गीतकार अधिकारीले गत २ अप्रिलदेखि नै ‘इलेकट्रोनिक भोटिङ’ खुला भएको र ३० अप्रिलसम्म भोट गर्न पाइने बताए ।

गीतकार अधिकारीले एउटा ‘डिभाइस’ बाट दैनिक एक पटक भोट गर्न सकिने जानकारी दिदै मत दिन आग्रह गरेका छन् । उनी मनोनयनमा परेको गीत ‘जिन्दगानी के छ र’ मा सिडी अधिकारीले सङ्गीत र स्वर रहेको छ भने यसको ‘म्युजिक भिडिओ’ लाई वविता श्रेष्ठले निर्देशन गरेकी हुन् ।

आगामी भदौ ८ गते अमेरिकास्थित एटलान्टामा सम्पन्न हुने उक्त अवार्डमा ‘इसा’ का सदस्य गीतकार मात्र प्रतिस्पर्धामा भाग लिन पाउँछन् । गीतकार अधिकारी उक्त संस्थामा तीन वर्ष अगाडि सन् २०२२ मा सदस्य बनेका थिए । गीतकार अधिकारीले रचना गरेका ‘तिमीले पराई ठाने पछि’, ‘रुपै मोहनी’, ‘बाजा बजाउँदै’, ‘मर्छु बरु छट्पटीमा’ लगायतका गीत लोकप्रिय छन् ।