कलाशैली संवाददाता । नेपाल चलचित्र विकास बोर्डको २५औँ वार्षिकोत्सवको अवसरमा सोमबार आयोजित कार्यक्रममा सञ्चार तथा सूचना प्रविधिमन्त्री पृथ्वीसुब्बा गुरुङले सर्वाधिक कमाइ गर्ने २५ फिल्मलाई सम्मान गरेका छन् । बोर्ड स्थापना भएदेखि नै सर्वाधिक कमाइ गर्ने २५ फिल्मको कलेक्सन सार्वजनिक गर्दै बोर्डले सम्मान गरेको हो । मन्त्री गुरुङसहित सञ्चार मन्त्रालयकी सचिव राधिका अर्याल, बोर्डका अध्यक्ष दिनेश डिसी र प्रथम अभिनेत्री भुवन चन्दले ती फिल्मका निर्माता, निर्देशक र कलाकारलाई सम्मान प्रदान गरेका थिए ।

बोर्डका अध्यक्ष दिनेश डिसीले सर्वाधिक व्यापार गर्ने फिल्मको सूची सार्वजनिक भएपछि कमाइबारे भ्रम फैलाउने प्रवृत्तिको अन्त्य भएको बताए । ‘कतिपयले फिल्मको कमाइबारे भ्रामक प्रचार गर्छन्। त्यसलाई रोक्न र पारदर्शिता कायम गर्न हामीले पछिल्लो २५ वर्षका सर्वाधिक कमाइ गर्ने २५ फिल्मलाई सम्मान गरेका हौँ । यो हाम्रो र फिल्मकर्मीहरूको साझा खुसीको क्षण हो’, उनले भन्नुभयो । अध्यक्ष डिसीले ‘बक्सअफिस @सिनेपा’ एपको शुभारम्भले रियल टाइम डाटा निर्माता र वितरकलाई उपलब्ध गराउने बताए ।

फोटो : कुवेर डंगोल / कलाशैली