कलाशैली संवाददाता । साइकोलोजिकल थ्रिलर जनरामा निर्माण भएको फिल्म ‘द ब्लू लाइट’ को छायांकन सकिएको छ । जेठ २२ गतेबाट सुरु गरिएको छायांकन उपत्यका भित्रका विभिन्न स्थानमा गरी २५ दिनमै सम्पन्न भएको हो । यसलाई बलिराम चौहानले निर्देशन गरेका हुन् । उनी फिल्म ‘बलिदान’ का लेखक तथा मुख्य सहायक निर्देशक समेत हुन् र यो उनको डेब्यु निर्देशन फिल्म हो ।

स्काईफल पिक्चर्सको प्रस्तुति रहेको फिल्म ‘द ब्लू लाइट’ को प्रमुख भूमिकामा बेनिशा हमाल, अर्पण थापा, महेश त्रिपाठी, आयुष्मान देशराज जोशी, सृष्टि श्रेष्ठ, सुरक्षा इटानी लगायतका कलाकारहरू छन् । फिल्मका बाल कलाकारहरूमा ग्रिसमा कटुवाल र सहारा शर्मा रहेका छन् ।

यो फिल्मको थिम पोस्टर र फस्टलुक पोस्टर पहिल्यै सार्वजनिक भइसकेका छन् । थिम पोस्टरमा निलो रङले घेरिएको वातावरणबीच एक बालिका उभिएकी थिइन्, जसको कपाल झुस्स परेको र अनुहारमा विछिप्त मुद्रा देखिएको थियो । यसले फिल्मको रहस्यमय तथा मनोवैज्ञानिक पृष्ठभूमि झल्काउँछ । यस्तै, छायांकनकै क्रममा सार्वजनिक गरिएको अर्को पोस्टरमा फिल्मकी मुख्य कलाकार बेनिशा हमाल बारमा औंलामा चुरोट च्यापेर तनावमा देखिएकी थिइन् ।

निर्माण पक्षले कलाकारको भूमिका र फिल्मको कथाबारे स्पष्ट पारेको छैन, तर निर्देशक चौहानले विस्तारै खुलाउँदै जाने बताएका छन् । यसमा रमन ग्रे रहनेछन् । कार्यकारी निर्मातामा भने छायाकार नरेन्द्र मैनाली र नायिका बेनिशा हमाल रहनेछन् । फिल्मको छायांकन मैनालीले नै गरेका हुन् । आकाश उखेडा मुख्य सहायक निर्देशक रहेको फिल्ममा रेलिजा श्रेष्ठ प्रोडक्सन डिजाइनर र दिलीप पन्त निर्माण नियन्त्रक रहेका छन् ।