कलाशैली संवाददाता । भारतीय सुपरस्टार रजनीकान्त फेरि एक पटक चर्चाको शिखरमा छन् । दक्षिण भारतीय फिल्म ‘कुली’ मा काम गरेबापत उनले लिएको पारिश्रमिकले उनलाई एसियाकै सबैभन्दा महँगो अभिनेता बनाएको भारतीय मिडियाहरूले दाबी गरेका छन् । ‘जेलर’ र ‘वेट्टायन’ जस्ता सफल फिल्मपछि रजनीकान्त निर्देशक लोकेश कनागराजको फिल्म ‘कुली’ मार्फत पर्दामा फर्किंदैछन् ।
मनी कन्ट्रोलको रिपोर्टअनुसार, उनले उक्त फिल्मबाट २ सय ६० देखि २ सय ८० करोड भारतीय रुपैयाँ पारिश्रमिक लिएका छन्, जुन एसियाली फिल्म उद्योगमा अहिलेसम्मकै सबैभन्दा उच्च पारिश्रमिक मानिएको छ ।
‘कुली’ को कुल बजेट ४ सय करोड रुपैयाँ रहेको बताइएको छ, जसको आधाभन्दा बढी रकम रजनीकान्तको पारिश्रमिकमै खर्च भएको छ । निर्माणमा कलानिधि मारन छन्, भने निर्देशक लोकेश कनागराजले ६० करोड र अर्का मुख्य अभिनेता नागार्जुनले ३५ करोड पारिश्रमिक लिएका छन् ।
फिल्ममा बलिउड अभिनेता आमिर खानको क्यामियो पनि रहनेछ । केही मिनेटको भूमिकाका लागि आमिरले २५ देखि ३० करोड भारु लिएको उल्लेख गरिएको छ । अभिनेत्री श्रुति हसन, अभिनेता सत्यराज र उपेन्द्र रावलाई भने बजार मूल्यअनुसारको पारिश्रमिक दिइएको छ ।
रजनीकान्त सन् २०१० मा रिलिज भएको ‘रोबोट’ फिल्मपछि नै एसियाका महँगा अभिनेताहरूको सूचीमा परेका थिए । ‘कुली’ मार्फत उनले फेरि शीर्ष स्थान पुनः प्राप्त गरेका छन् । ‘कुली’ १४ अगस्ट २०२५ मा विश्वव्यापी रूपमा प्रदर्शनमा आउने तयारीमा छ ।
