कलाशैली संवाददाता । दसैँको फूलपातीदेखि प्रदर्शनमा आएका तीन मध्ये फिल्म ‘बलिदान’ दर्शकबाट मिश्रित प्रतिक्रिया पाइरहेको छ । मिश्रित प्रतिक्रियाको असर घरेलु बजारमा परेको देख्न सकिन्छ । चलचित्र विकास बोर्डको ‘बक्सअफिस @सिनेपा’ एपमा देखिएको तथ्यांकअनुसार फिल्मले दोस्रो दिन कम शो पाएको छ ।

सन्तोष सेनद्वारा निर्देशित फिल्म ‘बलिदान’ ले पहिलो दिन २ सय ४४ शो पाएको थियो भने दोस्राे दिन २ सय १३ शोमा झरेको छ । फिल्म ‘बलिदान’ प्रति दर्शकबाट अपेक्षाकृत प्रतिक्रिया नआएकाे र हल अकुपेन्सी पनि साेचेजस्ताे नभएपछि प्रदर्शकले यस फिल्मकाे शो नै दाेस्राे दिनमा नै ३१  कटौती गरेका छन् । शाे मात्रै घटेकाे छैन, फिल्म ‘बलिदान’ काे प्रति शाेकाे व्यापार (हाेल्डओभर) पनि घटेकाे छ ।

फिल्मले पहिलो दिन (असोज १३) २ सय ४४ शोबाट ५७ लाख १९ हजार ३४० रुपैयाँ र दोस्रो दिन (असोज १४) २ सय १३ शोबाट ४८ लाख ४६ हजार रुपैयाँको व्यापार गरेको छ । औसतमा पहिलाे दिन फूलपातीमा प्रति शाे साढे २४ हजार ग्रस कलेक्सन दाेस्राे दिन घटेर २२ हजार ७ सय ५० मा आइपुगेकाे छ ।

दोस्रो दिन शोसँगै यसको व्यापार पनि कम भएको छ । यसले कालान्तरमा फिल्मको व्यापार घट्ने सङ्केत गरेको छ । फिल्मको द्वन्द्वको तारिफ भएता पनि निर्देशकीय पक्ष र पटकथा निकै कम्जोर रहेको समीक्षा ‘बलिदान’ ले पाइरहेको छ । फिल्ममा समीर भट्ट, सौगात मल्ल, अर्पण थापा, ऋचा शर्मालगायतका कलाकारको अभिनय रहेको छ।