कलाशैली संवाददाता । गएको भदौ २७ गते प्रदर्शन हुने भनिएको फिल्म ‘अभिमन्यूः च्याप्टर १’ असोज २४ मा प्रदर्शन हुने भएको छ । असोज १३ गते दसैँलाई लक्षित गर्दै प्रदर्शन हुने भनिएपनि प्रदर्शकले शो उपलब्ध गराउन नसकिने जनाएपछि यो फिल्म सर्न बाध्य भएको हो । स्वदेशी तीन र विदेशी एक फिल्मको दबाब झेल्न नसकेपछि निर्माण पक्षले फिल्मलाई नयाँ डेट दिएको छ ।
देशकै ठूलो क्यूएफएक्स चेनले असोज १३ मा यो फिल्मलाई शो दिन नसक्ने बताएपछि केही दिनको रस्साकस्सीपछि अन्ततः यो मितिबाट पनि फिल्म पोस्टपोन्ड भएको छ । असोज २४ मा नेपाली र हिन्दी दुवै भर्सन रिलिज गर्ने उल्लेख गरिएको छ । यसले फिल्मलाई सोलो रिलिजको मौका दिएको छ ।
फिल्ममा कामेश्वर चौरासिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल र शिशिर वाङ्देल लगायतका कलाकारहरूको अभिनय छ । निर्देशक सुशान्त गौतमको यो फिल्मको प्रचारप्रसारका सबै सामग्री पहिल्यै सार्वजनिक भइसकेका छन् ।
