कलाशैली संवाददाता । ‘द एकेडेमी अफ् मोसन पिक्चर आर्ट्स एन्ड साइन्सेस् (अस्कर अवार्ड)’मा नेपालको प्रतिनिधित्व ‘अञ्जिला’ फिल्मले गर्ने निर्णय स्थगित गरिएको छ । नेपालस्थित अन्तर्राष्ट्रिय फिचर फिल्म छनोट समितिले संयुक्त राज्य अमेरिकामा आयोजना हुने ९८औँ ‘अस्कर अवार्ड’ अन्तर्गत ‘अन्तरराष्ट्रिय फिचर फिल्म’ विधामा नेपालबाट ‘अञ्जिला’ सिफारिस गर्ने यसअघिको निर्णयलाई स्थगित गरेको छ ।

अध्यक्ष विमल पौडेलले शनिबार बसेको समितिको बैठकपछि यो जानकारी दिए । उनले ५ दिनको म्याद दिएर पुनः आवेदन मागिने बताए । ‘धेरै सोचविचार र छलफलपछि पुनः आवेदन मागेर छुटेका फिल्मलाई पनि समेट्ने तयारी छ,’ पौडेलले भने । यसअघि हेरिएका दुई फिल्म ‘अञ्जिला’ र ‘गुन्युचोलो’ बाहेकका अन्य फिल्महरूलाई पनि आवेदन मागेर पुनः मूल्याङ्कन गरिने उनको भनाइ छ । यसअघि आवेदनका लागि पर्याप्त समय नदिइएको र समितिका सदस्यहरूमा अस्कर मापदण्डसँग स्वार्थ बाझिएको भन्दै विरोध भएको थियो ।