कलाशैली संवाददाता । नेपाली अभिनेता अनुपविक्रम शाहीले बलिउडमा आफ्नो डेब्यू फिल्म ‘ब्याटल अफ गलवान’ गर्ने भएका छन् । सलमान खानको मुख्य भूमिकामा बनिरहेको यो फिल्मको पहिलो सेड्युल लद्दाखमा सम्पन्न भएको हो । अपूर्व लाखियाको निर्देशनमा सलमान खान फिल्म्सको ब्यानरमा निर्माण भइरहेको यो प्रोजेक्टले अनुपको बलिउडको बाटो खुल्ला गरेको हो ।
अनुपले सामाजिक सञ्जालमार्फत यो खुसीको खबर साटेका छन् । उनले लेखेका छन्, ‘सलमान खान सरसँग एसकेएफ फिल्म्सद्वारा निर्मित र अपूर्व लाखिया सरद्वारा निर्देशित, लद्दाखमा मेरो डेब्यू बलिउड फिल्मको पहिलो तालिका पूरा गर्न पाउँदा साँच्चै सम्मानित र कृतज्ञ महसुस गर्दैछु । अगाडिको यात्राको लागि उत्साहित छु।’
यो पोस्टले उनको उत्साह र सलमानसँगको सहकार्यप्रतिको कृतज्ञता झल्काउँछ । भारतीय सञ्चारमाध्यमहरूका अनुसार सलमान खान पनि यो सेड्युल पूरा गरी मुम्बई फर्किएका छन् । फिल्मको कथा सन् २०२० जुन १५ मा लद्दाखको गलवान घाँटीमा भारतीय र चिनियाँ सेनाबीच भएको झडपमा आधारित छ । यो घटनाले दुई देशबीचको सीमा तनावलाई प्रतिबिम्बित गर्दै सैनिक वीरताको कथा बुन्ने अपेक्षा गरिएको छ ।
सलमानले फिल्ममा सैनिक अधिकारीको भूमिका निर्वाह गरेका छन्, जसले उनको एक्सन इमेजलाई थप मजबुत बनाउनेछ । सन् २०२६ मा प्रदर्शन हुने यो फिल्मलाई बलिउडका प्रतीक्षित प्रोजेक्टमध्ये एक मानिएको छ ।
