कलाशैली संवाददाता । अमेरिकामा आयोजना हुने ९८औँ ‘द एकेडेमी अफ मोशन पिक्चर आर्ट्स एन्ड साइन्सेस (अस्कर अवार्ड)’ मा नेपालको प्रतिनिधित्व फिल्म ‘अञ्जिला’ ले गर्ने भएको छ । नेपालस्थित अन्तर्राष्ट्रिय फिचर फिल्म छनोट समितिले अन्तर्राष्ट्रिय फिचर फिल्म विधामा यो फिल्मलाई सिफारिस गरेको हो । समितिका अध्यक्ष विमल पौडेलका अनुसार, प्राप्त फिल्महरूमध्ये विषयवस्तु, कलात्मकता र सन्देशलाई आधार मानेर ‘अञ्जिला’ छनोट गरिएको छ ।

अस्करमा प्रतिस्पर्धाका लागि दुई नेपाली कथानक फिल्म ‘गुन्यु चोलो – द ड्रेस’ र ‘अञ्जिला’ प्राप्त भएका थिए । ‘अञ्जिला’ नेपाली महिला फुटबल टिमकी गोलरक्षक अञ्जिला तुम्बापो सुब्बाको जीवनीमा आधारित छ । खेलाडी सुब्बाले नै मुख्य भूमिकामा अभिनय गर्नुभएको यो फिल्मलाई मिलन चाम्सले निर्देशन गरेका हुन् । फिल्मका निर्माता प्रेमकुमार श्रेष्ठले खेलाडीको विषयमा बनेको फिल्मले नेपालको प्रतिनिधित्व गर्नु गौरवको कुरा भएको बताए ।

फिल्ममा अञ्जिला सुब्बासँगै दयाहाङ राई, सृजना सुब्बा, माओत्से गुरुङ, बुद्धी तामाङलगायतका कलाकारहरूले अभिनय गर्नुभएको छ। गत वर्ष वि.सं. २०८१ मा नेपालमा प्रदर्शन भएको यो फिल्मले घरेलु बजारमा करिब ९ करोडको व्यापार गरेको निर्माण पक्षले जनाएको छ ।