कलाशैली संवाददाता । दीपेन्द्र के. खनालको निर्देशनमा बनेको फिल्म ‘हरिबहादुरको जुत्ता’ दसैँको फूलपाती अर्थात् असोज १३ गतेदेखि प्रदर्शनमा आउँदै छ । टेलिभिजनको पर्दामा हरिवंश आचार्यको लोकप्रिय पात्र हरिबहादुर अब ठूलो पर्दामा देखा पर्दैछन् । यो पात्र हरेक पुस्ताका दर्शकमाझ परिचित छ, जसले गर्दा फिल्मप्रति दर्शकमा उत्साह देखिन्छ । रमाइलो र पारिवारिक कथावस्तुले भरिएको यो फिल्म दसैँको रमझममा दर्शकको मन जित्ने अपेक्षा गरिएको छ । यसले बक्स अफिसमा राम्रो प्रभाव पार्ने अनुमान छ ।
फिल्मको प्रचार सामग्रीले पनि दर्शकको ध्यान खिचेको छ । पोस्टर, गीत र टिजरलाई दर्शकले खुब रुचाएका छन् । सामाजिक सञ्जालमा फिल्मका गीतका क्लिपहरू भाइरल बनेका छन् । दुई हप्ताअघि सार्वजनिक ‘बेला बितेसी’ गीतलाई युट्युबमा २६ लाखभन्दा बढी पटक हेरिएको छ भने २ लाख ५० हजार टिकटक भिडियो बनेका छन् । त्यस्तै, ‘ढाका टोपी शिरैमा’ गीतलाई तीन दिनमा १० लाखभन्दा बढी पटक हेरिएको छ ।
यी गीतले फिल्मलाई व्यापक दर्शकमाझ पुर्याउन सफल भएको छ । फिल्मको सफलताका अन्य आधारहरू पनि छन् । हरिवंश आचार्यद्वारा लिखित यो फिल्ममा उनकै साथमा प्रकाश सपुत, स्वस्तिमा खड्का, प्रियंका कार्की, किरण केसी, राजाराम पौडेल, दिव्य देवलगायतका बलिया कलाकारको अभिनय छ ।
यी कलाकारको उपस्थितिले दर्शकको विश्वास थप बढ्ने निश्चित छ ।एसएम मोसन पिक्चर्सको ब्यानरमा बनेको यो फिल्म सरोज ओली र मोहितबंश आचार्यले निर्माण गरेका हुन् । छायांकन कृष्ण बहादुर थापाले गरेका छन् भने सम्पादन नकुल खड्काले । फिल्ममा वसन्त सापकोटा, दीपक शर्मा र प्रकाश सपुतको संगीत छ । आशिष अविरल, समीक्षा अधिकारी, मोहितबंश आचार्य, समिर खरेल र सज्जा चौलागाईंको स्वरले फिल्मको सङ्गीतलाई जीवन्त बनाएको छ।यी सबै आधारले ‘हरिबहादुरको जुत्ता’ दर्शकमाझ हिट हुने सम्भावना बलियो बनाएको छ ।
