कलाशैली संवाददाता । आगामी कात्तिक ७ गतेबाट प्रदर्शनमा आउने फिल्म ‘मैझारो’का दुई पोस्टर सार्वजनिक भएका छन् । बिहीबार निर्माण पक्षले फरक शैलीका पोस्टर सार्वजनिक गर्दै प्रदर्शन मिति घोषणा गरेको हो।पहिलो पोस्टरमा मुख्य कलाकार धिरज मगर, मिरुना मगर र दिया पुन देखिएका छन् । धिरज र मिरुना राई समुदायको पहिरनमा ढोलसहित प्रस्तुत छन् भने दिया पुन लिम्बू समुदायको ढाका साडीमा देखिएकी छन् ।
यो पोस्टरले फिल्म त्रिकोणात्मक प्रेम कथामा आधारित रहेको संकेत गर्छ।दोस्रो पोस्टरमा धिरज र मिरुना प्रेमिल मुद्रामा फलैचामा छन् । धिरजले बन्चरो समातेका छन् भने मिरुना कुर्ता–सुरुवालमा उनलाई हेर्दै छिन्, जसले उनीहरूबीचको प्रेम सम्बन्ध झल्काउँछ।विल्सन विक्रम राईको लेखन र निर्देशनमा बनेको यो फिल्मले पूर्वी पहाडको प्राकृतिक सौन्दर्य र मानव सम्बन्धलाई उजागर गर्ने प्रयास गरेको छ ।
फिल्ममा धिरज, मिरुना र दियासँगै बुद्धि तामाङ, सुनिल थापा, पुस्कर गुरुङ, अभयराज बराल, माउत्से गुरुङ, कविता आले, रजनी गुरुङ, प्रेम सुब्बा, उदय सुब्बा, अनिल सुब्बा, भूपेन्द्र लिङदेन र विशाल लिम्बुको अभिनय छ।‘तक्मे प्रोडक्सन’को ब्यानरमा बनेको फिल्ममा अनमोल गुरुङ र तोरेम्पाहाङ राईको संगीत छ। मित्र डी गुरुङको सम्पादन रहेको फिल्ममा राजेशपायल राई, झुमा लिम्बू, मेलिना राई, अस्मिता अधिकारी र अनमोल गुरुङको स्वरमा गीत समावेश छन्।
छायांकन सौरभ लामाले गरेका छन्।वितरण अधिकार आरआर फिल्म र डिजिटल स्ट्रिमिङ अधिकार ओएसआरले लिएको छ। विल्सन विक्रम राईले यो फिल्ममार्फत पहिलो पटक लेखन र निर्देशनमा डेब्यू गर्दैछन्। उनले यसअघि ‘तक्मे प्रोडक्सन’बाट फिल्म निर्माण गरिसकेका छन् ।
