कलाशैली संवाददाता । हाल प्रदर्शनरत फिल्म ‘कोशेढुंगा’ले केन्द्रीय चलचित्र जाँच समिति (सेन्सर बोर्ड) को निर्देशन पालना नगरेको विषय बाहिरिएको छ । यो विषय सार्वजनिक भएसँगै सञ्चार तथा सूचना प्रविधि मन्त्रालयले चलचित्र विकास बोर्डलाई पत्राचार गरी अनुगमन र प्रतिवेदन पेस गर्न निर्देशन दिएको छ ।मन्त्रालयको श्रव्यदृश्य तथा प्रसारण शाखाका अधिकृत विशाल भण्डारीले भदौ १७ गते पठाएको पत्रमा उल्लेख भएअनुसार ‘श्री नरदेवी फिल्म्स् प्रा.लि.’द्वारा निर्मित नेपाली भाषाको फिल्म ‘कोशेढुंगा’ले सेन्सर बोर्डको निर्णय पालना नगरेको गुनासो प्राप्त भएको उल्लेख छ ।
सेन्सर बोर्डले २०८२/०५/११ मा फिल्म जाँच गर्दा समाजमा अश्लील लाग्ने संवाद र शब्दहरू हटाएर सबै उमेर समूहका दर्शकका लागि सार्वजनिक प्रदर्शनको अनुमति दिएको थियो । तर, फिल्मले यो निर्णय पालना नगरेको बुझिएपछि मन्त्रालयले चलचित्र विकास बोर्डलाई अनुगमन गरी सेन्सर बोर्डको निर्देशनअनुसार प्रदर्शन व्यवस्था मिलाउन र प्रतिवेदन पेस गर्न निर्देशन दिएको छ ।
मन्त्रालयको पत्र भदौ १७ गते नै चलचित्र विकास बोर्डमा २ सय १३ नम्बरमा दर्ता भएको छ । तर, बोर्डले हालसम्म यस विषयमा कुनै प्रक्रिया अगाडि बढाएको देखिएको छैन । यो विषयले फिल्म उद्योगमा सेन्सर नियमको पालना र अनुगमनको प्रभावकारितामाथि प्रश्न उठाएको छ ।
