कलाशैली संवाददाता । आगामी शुक्रबार भदै २० देखि प्रदर्शन हुने फिल्म ‘रिमै’ को बुधवार साँझ आयोजित प्रिमियरमा प्रसंशा भएको छ । गुरुङ समुदायको कला र संस्कृतिलाई देखाईएको फिल्मलाई निम्तालुले तारिफ गरेका छन् । गुरुङ संस्कृति बुझ्ने दस्तावेजको रुपमा तयार भएको फिल्म हेर्नेले यसलाई तारिफ गरेका छन् । गुरुङ संस्कृति बुझ्न गैर गुरुङलाई पनि उपयोगी फिल्ममा दयाहाङ राई, रिश्मा गुरुङ, पुस्कर गुरुङ, माओत्से गुरुङ, कविता आले, गौमाया गुरुङ, अर्पण थापा लगायतको अभिनय रहेको छ । गुरुङ समुदायको सांस्कृतिक झाँकी प्रस्तुत गरेर सुरू भएको प्रिमियर हेरेपछि निम्तालु अतिथिले फिल्म युनिटलाई बधाई दिएका थिए ।
कलाकार विल्सन विक्रम राईले गुरुङ संस्कृतिलाई नजिकबाट चिन्न पाएको बताए । उनले भने,’यो फिल्मले हामीलाई संस्कृतिसँग जोडेको छ । यो आउँदो पुस्ताका लागि दस्तावेज बन्नेमा म विश्वस्त छु । हामीले हलमा विताएको समयमा एउटा गाउँमा पुगेर ती पात्रलाई महसुस गर्न पायौं ।’
कलाकार राई झैँ पुस्कर गुरुङले पनि फिल्मको माध्यमले आफू संस्कृतिसँग नजिक हुन् पाइरहेको बताए । ‘म ब्राह्मण, क्षेत्रीको समुदायमा हुर्किएको गुरुङ । मैले राम्रोसँग गुरुङ भाषा बोल्न जानेको छैन, नत संस्कृतिसँग नजिक छु । तर, विस्तारै फिल्ममा निर्वाह गर्ने पात्रले मलाई संस्कृतिसँग जोडेको छ’, उनले भने ।
अभिनेता दयाहाङ राईले फिल्म नयाँ पुस्ताले हेर्नै पर्ने बनेको बताए । उनी ‘रिमै’ आउँदो केही वर्षमा गुरुङ समुदायलाई बुझ्ने दस्तावेजको रुपमा प्रयोग हुने र नयाँ पुस्तालाई देखाइनेमा विश्वस्त छन् । खिलबहादुर गुरुङद्वारा निर्देशित यो फिल्म गोरखा सिरानचोक एण्ड लिगलिगकोट फिल्म्स प्रालिको प्रस्तुति र रोटेपिङ इन्टरटेनमेन्टको सहकार्यमा निर्माण भएको हो । फिल्ममा वीरमाया गुरुङ, वीरवल घले, डिबी गुरुङ, टेक गुरुङ, साथै बालकलाकार असिम सुब्बा, प्रेस्टु गुरुङ र प्रश्ना राना मगर लगायतको पनि अभिनय रहेको छ ।
फिल्मको पटकथा उपेन्द्र सुब्बाले लेखेका हुन् भने छायांकन शैलेन्द्रध्वज कार्कीले गरेका छन् । वीरवल घले कार्यकारी निर्माता रहेको यो फिल्ममा टीका गुरुङ, जितयात्री गुरुङ र दुनबहादुर घले निर्माता छन् । बिनु गुरुङ, रोशन भट्टराई र राजेश घिमिरे सह-निर्माताको भूमिकामा छन् । ‘रिमै’ शुक्रबारदेखि देशभरका हलहरूमा प्रदर्शनमा आउने भएको छ । यसको अग्रिम टिकट खरिद तथा बुकीङको सुविधा प्रदर्शकले दिईसकेका छन् ।
