कलाशैली संवाददाता । ‘जनै हराएको मान्छे : सम्बन्धका धागहरू’ लाई लिएर निर्माता तथा निर्देशक विश्वस्त थिए । सर्वकालिन ब्लकबस्टर फिल्म ‘पूर्णबहादुरको सारंगी’ का अभिनेता विजय बराललाई लिएर फिल्म निर्माण गरेको कारण निर्देशक हिमाल न्यौपाने ढुक्क झैँ देखिए । तर, विस्तारै फिल्मको कन्टेन्ट सार्वजनिक हुन् थालेपछि र दर्शक आकर्षण कम देखिएकोपछि उनी केही आत्तिए ।

नामलाई विवादमा ल्याएर प्रचार गर्ने फन्डा असफल भएपछि दर्शक रुवाउने फिल्मको रुपमा प्रचार गरेको फिल्म हेर्न नै हलसम्म आएनन् । फलत: निर्देशक न्यौपानेले डेब्यु फिल्म ‘जनै हराएको मान्छे : सम्बन्धका धागहरू’ मै असफल निर्देशकको ट्याग पाएका छन् । यो फिल्मले प्रदर्शनको १२ औं दिनसम्म अपेक्षाभन्दा न्यून कमाइ गरेको देखिएको छ । मंगलबारसम्म सिनेपाः बक्सअफिसमा यो फिल्मको कमाइ १ करोड १० लाख रुपैयाँ ग्रस छ ।

यो फिल्म ६ भदौमा ‘माग्ने राजा’ र ‘ताराहरू’सँगै रिलिजमा आएको थियो । ‘ताराहरू’ मा दर्शक नदेखिएपछि प्रदर्शकले पहिलो सातामै हलबाट उतै । तर, केदार घिमिरेको शिर्ष भूमिका रहेको फिल्म ‘माग्ने राजा’ भने दर्शकको रोजाईमा पर्यो । फिल्मले ४ करोड ९ लाख रुपैयाँको ग्रस व्यापार गर्न सफल भयो । तर, निर्देशक न्यापानेको हकमा भने ‘दर्शक हराए’ ।

निर्देशक न्यौपाने निर्देशित यो फिल्ममा विजयसहित मिरुना मगर र केकी अधिकारीको पनि शीर्ष भूमिका छ । निर्देशक न्यौपानेले नत फिल्म समीक्षकको राम्रो समीक्षा पाउन सके नत अभिनेता बराल लगायतको कलाकारको स्टारडमको नै प्रयोग गर्न सके । दर्शक रुवाउँदा फिल्म चल्छ भन्ने मान्यता अनुसार फिल्म निर्माण गर्दा दर्शकले साथ् दिएनन् र फिल्म हेरेका दर्शकले अन्यलाई सिफारिस गरेनन् ।