कलाशैली संवाददाता । निर्देशक एकता पौडेलको पहिलो फिल्म ‘हर्ष’को फर्स्टलुक पोस्टर सार्वजनिक गरिएको छ । मङ्सिर १२ गतेलाई प्रदर्शन तय गरिएको फिल्मको सार्वजनिक दुवै पोस्टरमा फिल्मका मुख्य कलाकारहरूलाई आकर्षक रूपमा प्रस्तुत गरिएको छ । पहिलो पोस्टरमा अभिनेता खगेन्द्र लामिछाने, अभिनेत्री वर्षा राउत र शर्मिला मल्ललाई फिल्मको नामअनुरूप हर्षित भावमा मिठो मुस्कानसहित देख्न सकिन्छ भने सन्तोष पन्तलाई असन्तुष्ट भावमा छड्के नजरले हेरिरहेको देखाइएको छ ।
यो पोस्टरमा खगेन्द्र र वर्षालाई छोरासँग रमाइरहेको दृश्यमा प्रस्तुत गरिएको छ, जहाँ छोराको भूमिकामा बालकलाकार साइमन वादी छन् । दोस्रो पोस्टरमा पनि खगेन्द्र र वर्षालाई मिठो मुस्कानमा देख्न सकिन्छ । नेपथ्यमा सम्भवतः फिल्मको गीतको दृश्यमा सन्तोष पन्तसँगै विशाल पहारी, लुनिभा तुलाधर, माओत्से गुरुङ र अंशु महर्जन नाचिरहेको र रमाइरहेको देखिन्छ । यो पोस्टरमा बालकलाकार साइमलाई बालकृष्णको पहिरनमा प्रस्तुत गरिएको छ भने अभिनेता नीर शाहलाई गम्भीर भावमा देखाइएको छ ।
सार्वजनिक दुवै पोस्टरले पारिवारिक जीवनका उतारचढावको कथा प्रस्तुत गर्ने स्पष्ट संकेत गर्छन् । लामो समयपछि दर्शकले पारिवारिक ड्रामा हेर्न पाउने अपेक्षा गरिएको छ । निर्देशक एकता पौडेलले आफ्ना दिवंगत मामा निर्देशक शिव रेग्मीको पदचाप पछ्याउदै फिल्म निर्देशनमा डेब्यु गर्दैछिन् । न्यूयोर्क फिल्म एकेडेमीबाट फिल्म मेकिङ र आमसञ्चारमा स्नातक तथा व्यवस्थापन र नेतृत्वमा स्नातकोत्तर गरेकी पौडेलले यसअघि केही छोटा फिल्महरू निर्माण गरिसकेकी छन् ।
चितवनमा पूर्ण रूपमा छायांकन गरिएको यो फिल्म हाल पोस्ट-प्रोडक्सनको चरणमा छ । पौडेलले आफू र आफ्नो टिमले ‘हर्ष’लाई उत्कृष्ट रूपमा प्रस्तुत गर्ने बताउँदै आएकी छन् । फिल्ममा खगेन्द्र लामिछाने, वर्षा राउत, नीर शाह, सन्तोष पन्त, शर्मिला मल्ल, माओत्से गुरुङ, विशाल पहारी, निमा पाण्डे, लुनिभा तुलाधर, अंशु महर्जन, रेनु प्रधान, सुवर्ण थापा, श्रृष्टि महर्जन, संगीता नापित र बालकलाकार साइमन वादीको अभिनय रहेको छ ।
अष्टलक्ष्मी प्रोडक्सन्स र ई-प्राइम मुभिजको ब्यानरमा निर्माण भएको यो फिल्मको कथा निर्देशक पौडेल आफैंले लेखेकी हुन् । फिल्ममा आलोक शुक्लाको छायांकन, समीर/हिमाल, वसन्त सापकोटा र एलिश कार्कीको संगीत, लोकेश बज्राचार्यको सम्पादन तथा सुनिल क्षेत्री र निर्देशक पौडेलको कोरियोग्राफी रहेको छ ।
निर्मातामा प्रशन्न पौडेल र विकास पौडेल छन् भने हिक्मत चोखल कार्यकारी निर्माता छन् । फिल्ममा स्वर्गीय शिव रेग्मी, डा. कृष्णहरी बराल, पवित्रा घिमिरे र नीरकमल खड्काको शब्द रचना छ ।
