कलाशैली संवाददाता । ‘बेहुली फ्रम मेघौली’ फिल्ममार्फत निर्देशनमा डेब्यु गरेका निर्देशकद्वय सजन काफ्ले र आकास बरालले नयाँ फिल्म ‘जिरो डिग्री’ निर्माण गर्ने भएका छन् । मेघौली फिल्म्सको ब्यानरमा बन्ने यो फिल्मको घोषणा सोमबार मिनिमल पोस्टर सार्वजनिक गर्दै गरिएको हो । फिल्मको कथा राजन भुसालले लेखेका छन् भने पटकथा र संवाद निर्देशकद्वय काफ्ले र बरालले तयार पारेका छन् ।
‘जिरो डिग्री’ सडक नभएको गाउँमा मातापिताको निधन हुँदा विदेशमा रहेका छोराछोरी आइपुग्नुअघि शव जोगाउन डीप फ्रिज बोकेर गाउँ पुर्याउँदा उत्पन्न हुने परिस्थितिमा केन्द्रित छ । यो फिल्म ‘लाइट कमेडी’ शैलीमा बन्ने निर्देशकले बताएका छन् । मुख्य भूमिकामा अभिनेता विजय बराल देखिनेछन् । ट्राइडेन्ट कन्सेप्टका रोयल भीमसेनले डिजाइन गरेको पोस्टरमा डीप फ्रिजलाई केही व्यक्तिहरूले खोला तार्दै गरेको दृश्य छ ।
परम्परागत रूपमा कलाकारको अनुहार वा ठूला दृश्य राख्ने चलनविपरीत कथाको मुख्य वस्तु डीप फ्रिजलाई पोस्टरमा केन्द्रमा राखिएको छ । फिल्मका कार्यकारी निर्माता मोती कार्की हुन् । ‘जिरो डिग्री’को छायाङ्कन तिहारपछि सुरु हुनेछ र अर्को वर्ष प्रदर्शन गर्ने लक्ष्य छ ।
