कलाशैली संवाददाता । असोज ३ गते रिलिज हुने फिल्म ‘जारी-२ : सङ अफ च्याब्रुङ’को टिजर सार्वजनिक गरिएको छ । २ मिनेट ३४ सेकेन्ड लामो टिजरले लिम्बु समुदायको पहिचानसँग जोडिएको च्याब्रुङ बाजाको सेरोफेरोमा आधारित कथालाई उजागर गरेको छ । टिजरको सुरुवातमा च्याब्रुङ नाच्न नजान्ने लिम्बुलाई ‘नाङ्गो’ पहाडसँग तुलना गर्ने संवादले दर्शकको ध्यान खिच्छ ।

च्याब्रुङलाई लिम्बु समुदायको खुशीको स्वरको रूपमा प्रस्तुत गर्दै टिजरले फिल्म सांस्कृतिक पहिचान, सामाजिक र पारिवारिक उतारचढावमा केन्द्रित हुने संकेत गर्छ । उपेन्द्र सुब्बाले लेखन र निर्देशन गरेको यो फिल्मलाई रामबाबु गुरुङ, मधु मिजार र जीवन गुरुङले निर्माण गरेका छन् । फिल्ममा दयाहाङ राई, मिरुना मगर र विजय बरालको प्रमुख भूमिका छ । यस्तै, बुद्धि तामाङ, ऋचा शर्मा, पुष्कर गुरुङ, प्रेम सुब्बा, माओत्से गुरुङ, मानहाङ लावती, विष्णु मोक्तान, कमलमणि नेपाल, अनिल सुब्बा, रेखा लिम्बु, बेदना राई र सिर्जना निङ्लेखुको पनि अभिनय रहेको छ ।

बाँसुरी फिल्म्स र कबड्डी फिल्म्सको ब्यानरमा निर्मित यो फिल्मलाई यो वर्षको बहुप्रतिक्षित र व्यापारिक रूपमा सफल हुने फिल्मको रूपमा हेरिएको छ ।