कलाशैली संवाददाता । भारतीय फिल्म ‘साथिया’ बाट सहायक अभिनेताका रूपमा आफ्नो करियर सुरु गरेका बलिउड अभिनेता दीपराज राणा नेपाली फिल्म ‘सुख दुःख’ मा अभिनय गर्ने भएका छन् । उनलाई फिल्मकी अभिनेत्री तथा निर्मात्री नीता ढुङ्गाना अधिकारीको टिमले अनुबन्ध गरेको हो ।
‘सिंघम रिटर्न्स’, ‘प्रेम रतन धन पायो’, ‘दबङ ३’ र पछिल्लो समय ‘मेट्रो इन डिनो’, ‘बिल्ली उस्ताद’, ‘सितारे जमीन पर’ जस्ता फिल्ममा अभिनय गरिसकेका दीपराजले यसअघि स्व. श्रीकृष्ण श्रेष्ठको ‘कोहिनूर’ मा पनि अभिनय गरेका थिए । त्यसको लामो समयपछि उनी पुनः नेपाली फिल्ममा देखिन लागेका हुन् ।
नीताको निर्देशनमा बन्ने फिल्मको कथा मन परेकाले आफू यसमा काम गर्न इच्छुक भएको दीपराजले बताए । निर्माण पक्षका अनुसार, फिल्मको कथा सुनेपछि दीपराज भावुक बनेका थिए। यद्यपि, उनको भूमिकाबारे भने अहिले कुनै खुलासा गरिएको छैन । आगामी फागुनदेखि छायांकन सुरु गर्ने तयारीमा रहेको यस फिल्ममा हालै अभिनेत्री विपना थापालाई पनि अनुबन्ध गरिएको छ । यसअघि नीता र विपनाले फिल्म ‘ह्रस्वदीर्घ’ मा सहकार्य गरिसकेका छन् ।
दीपराज र विपनाबाहेक मिथिला शर्मा र मदनकृष्ण श्रेष्ठ पनि यस फिल्ममा अनुबन्धित भइसकेका छन् । अन्य कलाकारहरूबारे भने निर्माण टिमले खुलासा गरेको छैन । फिल्मको छायांकनका लागि चर्चित भारतीय छायाकार कवीरलाल र शाहिदलाललाई अनुबन्ध गरिएको छ । नीता फिल्म्सको ब्यानरमा बन्ने यो फिल्म आगामी वर्ष दसैँको फूलपातीबाट प्रदर्शनमा आउने तयारीमा छ ।
