कलाशैली संवाददाता । नेपाली महिला फुटबल टिमकी गोलरक्षक तथा पूर्व कप्तान अञ्जिला तुम्बापो सुब्बाको जीवनीमा आधारित फिल्म ‘अञ्जिला’ अस्ट्रेलियामा प्रदर्शन हुने भएको छ । यो फिल्मको प्रिमियर आउँदो अगस्ट २३ तारिखमा सिड्नीमा हुँदैछ । गत जुलाई ३० मा एडिलेडबाट सुरु भएको प्रदर्शन अब सिड्नी, न्युक्यासल, ब्रिसबेन, मेलबर्न लगायतका सहरमा पनि हुनेछ । खेलाडी सुब्बाका गडफादरका रूपमा परिचित निर्माता तथा कलाकार प्रेमकुमार श्रेष्ठले यसको जानकारी दिएका हुन् ।

निर्माता श्रेष्ठले नेपालमा प्रदर्शन हुँदा केही कारणले फिल्म अस्ट्रेलियामा ल्याउन नसकिएको बताए । उनले भने, ‘नेपालसँगै विश्वभरबाट पाएको मायासँगै यहाँ अस्ट्रेलियामा रहनुभएका खेलाडी र दर्शकले फिल्मबारे धेरै जिज्ञासा राख्नुभएको थियो । अन्ततः म फिल्म लिएर यहाँ आएको छु, अब विभिन्न सहरमा फिल्म प्रदर्शन गर्ने हाम्रो तयारी रहेको छ ।’

नेपालमा प्रदर्शनको सय दिन पूरा गरेको यो फिल्म सिड्नीको अबर्नमा रहेको रिडिङ सिनेमामा अगस्ट २३ मा साँझ ६ बजे प्रिमियर हुँदैछ । स्थानीय पाल्पा इन्टरटेनमेन्टले सिड्नीमा पहिलोपटक यो फिल्मको प्रदर्शनी गर्न लागेको हो । दर्शकहरूले ३५ डलरको टिकट खरिद गरेर फिल्म हेर्न सक्नेछन् ।

मिलन चाम्स को निर्देशनमा तयार भएको यो फिल्म खेलाडीको विषयमा बनेको पहिलो सफल नेपाली फिल्म हो । फिल्ममा खेलाडी सुब्बासँगै सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमिन गुरुङ, बुद्धि तामाङ लगायतका कलाकारहरूको अभिनय रहेको छ । निर्माता श्रेष्ठले फिल्म प्रदर्शनको मुख्य उद्देश्य ‘अञ्जिलाको आफ्नै घर’ अभियानलाई सहयोग गर्नु रहेको बताएका छन् ।