कलाशैली संवाददाता । मोहित सुरीको निर्देशनमा बनेको फिल्म ‘सैयारा’ एक सङ्गीतमय र भावनात्मक प्रेमकथाको मिश्रण हो । नयाँ अनुहार अहान पाण्डे र अनीत पाड्डाको डेब्यूले यो फिल्मलाई जीवन्त बनाएको छ । उनीहरूको केमेस्ट्रीले दर्शकलाई तुरुन्तै आकर्षित गर्छ । कथा वाणी बत्रा (अनीत पाड्डा) एक गोप्य कवयित्री र कृष कपूर (अहान पाण्डे) एक महत्वाकांक्षी तर रिसाहा गायक, वरपर केन्द्रित छ ।

विवाहको दिन प्रेमीले छोडेपछि टुटेकी वाणीको भेट पत्रकारको जागिरका क्रममा कृषसँग हुन्छ । कृषले वाणीको कविता पढेर उनलाई गीत लेखनको प्रस्ताव राख्छन् र सँगै काम गर्दै उनीहरू प्रेममा पर्छन् । तर, उनीहरूको प्रेमको बाटोमा थुप्रै अवरोध छन्, जसलाई फिल्मले क्रमशः खोल्छ । सङ्कल्प सदानाको कथा र स्क्रिनप्लेले दर्शकलाई भावनात्मक रूपमा बाँध्छ, यद्यपि केही दृश्यले सुरीको पुरानो फिल्म ‘आशिकी २’ को सम्झना दिलाउँछ ।

रोहन शङ्करका संवाद गहिरा र प्रभावकारी छन् । सुरीको परिपक्व निर्देशनले कथालाई जीवन्त बनाएको छ । इन्टरभलको ट्विस्टले दर्शकलाई चकित पार्छ, जसका लागि निर्माताको प्रशंसा गर्नुपर्छ । कृषको दमदार प्रवेश, वाणीको विगत स्वीकार्ने क्षण र इन्टरभलपछिको ब्याकस्टेज ड्रामाले गहिरो प्रभाव छोड्छ । प्री-क्लाइमेक्स रोमाञ्चक र फिनाले हृदयस्पर्शी छ ।

केही कथानक ‘आशिकी २’ सँग मिल्दोजुल्दो लाग्छ र बेलाबेला अस्वाभाविक दृश्यहरूले हलमा हाँसो निम्त्याउन सक्छ । तर , अहान पाण्डेले शानदार डेब्यू गरेका छन् । उनको स्क्रिन उपस्थिति र भावनात्मक दृश्यहरू प्रभावशाली छन् । अनीत पाड्डाले चुनौतीपूर्ण भूमिकालाई सहजतासँग निर्वाह गरेकी छिन् । सहायक कलाकारहरू गीता अग्रवाल, राजेश कुमार, वरुण बडोला, शाद रन्धावा, सिड मक्कर, शान आर ग्रोभर र नील दत्ताले आफ्ना भूमिकालाई न्याय गरेका छन् ।

सङ्गीत फिल्मको सबैभन्दा ठूलो सम्पत्ति हो । टाइटल ट्र्याक, ‘धुन’, ‘बरबाद’, ‘तुम हो तो’ र ‘हमसफर’ ले कथालाई भावनात्मक गहिराइ दिन्छ । जोन स्टुवार्ट एडुरीको पृष्ठभूमि सङ्गीतले दृश्यको प्रभाव दोब्बर बनाउँछ । विकास सिवारमणको छायांकनले जीवन्त लुक प्रदान गर्छ । लक्ष्मी केलुस्कर र रजत पोद्दारको प्रोडक्सन डिजाइन, शील शर्माको कस्ट्युम र एजाज गुलाबको एक्सन सन्तुलित छन् ।

देवेन्द्र मुर्डेश्वर र रोहित माकवानाको सम्पादनले फिल्मको गति कायम राख्छ । ‘सैयारा’ भावना, सङ्गीत र रोमान्सको सुन्दर मिश्रण हो । मोहित सुरीको निर्देशन, अहान र अनीतको केमेस्ट्री, चार्टबस्टर सङ्गीत र प्राविधिक उत्कृष्टताले यो फिल्मलाई अविस्मरणीय बनाउँछ । बक्स अफिसमा यो फिल्मले बलियो ओपनिङ गर्दै यो वर्ष सन् २०२५ को ब्लकबस्टर घोषणा भईसकेको छ ।