कलाशैली संवाददाता । खिल बहादुर गुरुङको निर्देशनमा बनेको फिल्म ‘रिमै’को टिजर सार्वजनिक भएको छ । मंगलबार सार्वजनिक भएको करिब २ मिनेट लामो टिजरसँगै निर्माण टिमले फिल्मको प्रदर्शन मिति एक हप्ता अगाडि ल्याएको छ । यसअघि भदौ २७ मा प्रदर्शन हुने भनिएको फिल्म अब भदौ २० बाट देशव्यापी रिलिज हुनेछ ।

टिजरले रहस्यमय, रोमाञ्चक र भावनात्मक कथावस्तुको संकेत गरेको छ । ग्रामीण परिवेश, संस्कृति, प्रेम, पीडा र बदलाको झलक टिजरमा देखिन्छ । दयाहाङ राईको गम्भीर भूमिका, रिश्मा गुरुङको आत्मीय उपस्थिति, अर्पण थापाको रहस्यमय चरित्र र बुद्धि तामाङको गहिरो अभिनयले दर्शकको ध्यान खिच्ने देखिन्छ ।

फिल्मको छायांकन र संवादले समाजका गहिरा यथार्थ प्रस्तुत गर्ने आशा टिजरले जगाउँछ । टिजरको अन्त्यमा देखिएको तनावपूर्ण दृश्यले कथामा द्वन्द्वको महत्वपूर्ण भूमिका रहने संकेत गर्छ । गुरुङ संस्कारलाई विशेष रूपमा प्रस्तुत गरिएको टिजरले दर्शकमा उत्साह पैदा गर्ने निर्माण टिमको विश्वास छ ।

गोरखा सिरानचोक एण्ड लिगलिगकोट फिल्म्स् प्रालिको प्रस्तुति र रोटेपिङ इन्टरटेनमेन्टको सहकार्यमा बनेको फिल्ममा गौमाया गुरुङ, कविता आले मगर, माओत्से गुरुङ, पुस्कर गुरुङ, वीरमाया गुरुङ, वीरवल घले, डिवी गुरुङ, टेक गुरुङ र बालकलाकार असिम सुब्बा, प्रेस्टु गुरुङ र प्रश्ना राना मगरको अभिनय छ ।

उपेन्द्र सुब्बाको लेखन रहेको फिल्मको छायांकन शैलेन्द्र ध्वज कार्कीले गरेका छन् । वीरवल घले कार्यकारी निर्माता रहेको फिल्ममा टिका गुरुङ, जित यात्री गुरुङ र दुन बहादुर घले निर्माता तथा बिनु गुरुङ, रोशन भट्टराई र राजेश घिमिरे सह-निर्माता छन् । दीपक शर्मा र थानेश्वर गौतमको संगीत, किरण चाम्लिङ राई मुख्य सहायक निर्देशक, बिष्णु मैनाली प्रोडक्सन म्यानेजर र मित्र डी. गुरुङको सम्पादन रहेको छ ।