कलाशैली संवाददाता । मंगलबार काठमाडौंमा एक कार्यक्रम गर्दै फिल्म ‘गुन्युचाेलो : द ड्रेस’को पहिलो गीत ‘म फूल हुँ कि काँडा’ सार्वजनिक गरिएको छ । बार डान्स शैलीमा कोरियोग्राफी गरिएको उक्त गीतमा नाजिर हुसेनलाई प्रस्तुत गरिएको छ । फिल्ममा नाजिरले लैंगिक अल्पसंख्यक समुदायको प्रतिनिधित्व गर्ने पारालैंगिक पात्र गुलाबीको भूमिका निर्वाह गरेका छन् ।
लेखु सहयात्रीको शब्द रचना तथा संगीत रहेको यस गीतलाई मनिषा पोखरेलले गाएकी हुन् । गीतले प्रेमले ओतप्रोत भएकी एक पात्रले मनभित्रको मायाको चाहनालाई आह्वान गरेको प्रतीत हुन्छ । सुशील सिटौललगायतका कलाकार भने गीतमा नाजिरको नृत्य र यौवनको मादकतामा झुमेको देखिन्छ ।
युवतीको आवरणमा देखिएका नाजिरले गीतमा मन परेपछि जोवन सुम्पिन तयार रहेको भन्दै आफूलाई पनि मुटुमा सजाउन आग्रह गरेका छन् । गतवर्ष लैंगिक अल्पसंख्यकको भूमिकामा विपिन कार्कीले पनि ‘एक भगवत एक गीता’ मा अभिनय गरेका थिए । समुन्द्र भट्टको निर्देशन रहेको ‘गुन्युचोलो’ मा नाजिरलाई पारालैंगिक महिला (ट्रान्सवुमन) को भूमिकामा प्रस्तुत गरिएको छ । उक्त फिल्म भदौ १३ देखि सार्वजनिक प्रदर्शनमा आउने भएको छ । फिल्ममा सञ्चिता लुइँटेल, सुशील सिटौला, राजकुमार घोष, शिशिर राणा, अनुपम श्रेष्ठ, विशाल पहारीलगायतको पनि महत्वपूर्ण भूमिका रहेको छ ।
नेपालको पहिलो पूर्णरूपको ट्रान्स स्टोरीमा निर्मित दाबी गरिएको यस फिल्मको अन्तर्राष्ट्रिय वितरण अमेरिकाको बफेलो एट्लेले गर्ने भएको छ । यसलाई नेपाली फिल्म प्रोडक्सन हाउस र हलिउड फिल्म प्रोड्क्सन हाउसको संयुक्त सहकार्यमा निर्माण गरिएको हो । ‘गुन्युचोलो’ मा आकाश बुढाथोकी र भि–भन्से जानुबोनको लगानी छ । आलोक शुक्लाले खिचेको ‘गुन्युचोलो’ को पटकथा स्वयं नाजिरले निर्देशक भट्टसँग मिलेर लेखेका हुन् ।
