कलाशैली संवाददाता । अभिनेता विजय बरालले फिल्म ‘पूर्णबहादुरको सारंगी’ मा गरेको अभिनयलाई दर्शकले रुचाए । फलत: फिल्मले गरेको व्यापार ऐतिहासिक बनिसकेको छ । उनले गएको सोमबार राष्ट्रपति भवनमा सम्पन्न ‘राष्ट्रिय एवं विशेष फिल्म पुरस्कार तथा दीर्घसम्मान २०८२’ मा उत्कृष्ट अभिनेताको अवार्ड उचाले ।
फिल्ममा विजयले पूर्णबहादुर गन्धर्वको भूमिका निर्वाह गरेका छन्, जसले गरिबी, सामाजिक भेदभाव र पारिवारिक जिम्मेवारीबीच आफ्नो छोराको भविष्यका लागि सङ्घर्ष गरिरहेको गन्धर्व समुदायको एक पिताको कथा प्रस्तुत गर्छ । उनको अभिनयले दर्शक र समीक्षकहरूको मन जितेको छ, जसलाई उनले पुरस्कारमार्फत पुष्टि गरेका छन् ।
सर्लाहीमा जन्मिएका विजयले ‘छड्के’ बाट आफ्नो अभिनय यात्रा सुरु गरेका थिए । ‘कबड्डी’, ‘कबड्डी ४: द फाइनल म्याच’ र ‘जारी’ जस्ता सफल फिल्ममा अभिनय गरिसकेका उनले ‘पूर्णबहादुरको सारंगी’मार्फत आफ्नो करियरको सबैभन्दा ठूलो उपलब्धि हासिल गरेका छन् ।
