कलाशैली संवाददाता । तक्मे प्रोडक्सन को ब्यानरमा फिल्म ‘मैझारो’ निर्माण हुने घोषणा गरिएको छ । निर्माण पक्षले अभिनेताका रूपमा धीरज मगरलाई अनुबन्ध गर्दै फिल्म निर्माणको जानकारी गराएको हो । यो फिल्मको लेखन तथा निर्देशन कलाकार विल्सन विक्रम राईले गर्नेछन्, जुन उनको निर्देशनमा डेब्यु हुनेछ ।
बाल्यकालमा नै अभिनेता राजेश हमालको फिल्म ‘साथी’ मा अभिनय गरेका विल्सन विक्रम राईले त्यसयता दर्जनौं फिल्ममा अभिनय गरेर दर्शकको मन जितिसकेका छन् । फिल्मको छायांकन आगामी साउनको पहिलो हप्ताबाट सुरु हुनेछ । निर्देशक राईले यो फिल्मको छायांकन ईलाम र पाँचथरका रमणीय स्थानहरूमा गरिने बताए । उनका अनुसार यो सामाजिक कथावस्तुमा आधारित फिल्म पूर्वी पहाडको जीवनशैली, संस्कृति र सामाजिक यथार्थमा आधारित हुनेछ ।
फिल्ममा अनमोल गुरुङ र तोरेम्पा हाङ राईको संगीत रहनेछ भने सौरभ लामाले छायांकन गर्नेछन् । निर्माण टिमका अनुसार अन्य कलाकारहरूको नाम चाँडै सार्वजनिक गरिनेछ ।
तक्मे प्रोडक्सनले यसअघि निर्माण गरेका हास्य सामग्री र सांगीतिक प्रस्तुतिहरू लोकप्रिय रहेका छन् । ‘मेरी बास्सै’ टेलिफिल्म मार्फत ‘तक्मे बुढा’ नामले चर्चामा आएका विल्सन विक्रम राईको निर्देशनमा बन्न लागेको ‘मैझारो’ प्रति दर्शक र फिल्मकर्मीहरूमा उत्साह देखिएको छ ।
