कलाशैली संवाददाता । आगामी फागुन १ मा प्रदर्शन निश्चित गरिसकेको फिल्म ‘कल्ली’ सोही मितिमा नेपालसहित भारत र पाकिस्तानमा पनि एकसाथ रिलिज हुने बताइएको छ । यसका लागि फिल्मलाई हिन्दी भाषामा समेत डब गरिने निर्माणपक्षले जानकारी दिएको छ ।

फिल्मका निर्माता किरण नेपालीले दिएको जानकारी अनुसार, ‘कल्ली’ भारत र पाकिस्तानमा हिन्दी भाषामा रिलिज गरिने छ । फिल्मलाई भारतका लागि एम.के फिल्म डिस्ट्रिब्यूटर र पाकिस्तानका लागि हिप्पो फिल्मस्ले वितरण अनुमति लिएका हुन् । नेपालभर वितरणको जिम्मा काफिया र कुबेर फिल्मस्ले लिएका छन् ।

लक्ष्मण सुनारको लेखन तथा निर्देशनमा तयार भएको ‘कल्ली’ को यतिबेला पोष्ट प्रोडक्सनको काम भईरहेको छ । महेश दवाडीको पटकथा लेखन रहेको फिल्ममा सौगात मल्ल, उत्तम प्रधान, वेनिशा हमाल, नाजिर हुसेन, अर्पण थापा, वर्षा राउत, सुलक्षण भारती लगायतका कलाकारहरुको अभिनय रहेको छ । यसअघि फिल्ममा पल शाहलाई मुख्य भूमिकाका लागि अनुबन्ध गर्दै फिल्मको पोष्टरसमेत सार्वजनिक गरिएको थियो । पछि पललाई सौगातले रिप्लेस गरेका हुन् ।

लेकाली इन्टरटेन्मेन्ट र कस्तुरी प्रोडक्सनको प्रस्तुतिमा निर्माण भएको फिल्म ‘लोभले लाभ, लाभले विलाप’ को लोकोक्तीमा आधारित रहेको बताइएको छ । लोभ पलाएपछि मानिसको जिन्दगी कहाँबाट कहाँ पुग्छ भन्ने कथामा यो फिल्म बनेको निर्माणपक्षको भनाइ छ । फिल्ममा आशिष अविरल, सरिता राई र केतन क्षेत्रीको संगीत छ ।