कलाशैली संवाददाता ।‘मानिस ठूलो पैसाले हुन्छ, लुगाले हुँदैन’ मा विश्वास गर्ने कुबेर शर्मा उर्फ मगन्तेनारायणको चरित्रमाथि बनेको फिल्म ‘माग्ने राजा’ को टिजर सोमबार ओएसआरको युट्युब च्यानलमार्फत सार्वजनिक गरिएको छ । झन्डै २ मिनेटको टिजरमा केदार घिमिरे अभिनित पात्र कुबेर शर्माको चरित्रलाई पस्किने प्रयास गरिएको छ ।
सामीप्यराज तिमल्सेनाको पटकथामा ऋषि लामिछानेको निर्देशन रहेको ‘माग्ने राजा’ मा माग्नेदेखि राजासम्मको यात्रा वर्णनलाई देख्न सकिन्छ । हास्य शैलीका संवाद तथा दृश्यको भरपूर प्रयोग गरिएको टिजरमा केदार घिमिरेलाई विभिन्न गेटअप तथा चरित्रमा पस्किइएको देख्न सकिन्छ ।
विल्सन विक्रम राई केदारको भान्जा बनेको देख्न सकिन्छ । विल्सन र केदार घिमिरेको जोडी टेलिभिजनको पर्दामा माग्ने बुढा र तक्मे बुढाको जोडीको रुपमा परिचित छ । टिजरमा वर्षा सिवाकोटी र शिशिर वाङदेल पनि अटाएका छन् । टिजरले दुवैको भूमिकाको बारेमा भने उति धेरै खुलाएको छैन ।
केदार घिमिरेलाई पोस्टरमार्फत् नै भिन्न स्वरुपमा प्रस्तुत गरेर चर्चा कमाएको निर्माण टिमले टिजरमा पनि माग्नेलाई नयाँ स्वरुपमा प्रस्तुत गरेको छ । ‘माग्ने राजा’मा केदार घिमिरे पहिलो पटक मुख्य भूमिकामा देखिन लागेका हुन् ।
आरम्भ प्रडक्सनको ब्यानरमा मुनाल घिमिरेको प्रस्तुतकर्ता र मधुसुदन शर्मा निर्माता रहेको फिल्ममा नरेन्द्र मैनालीको छायांकन,सुजिल कर्माचार्यको पाश्र्व संगीत र मित्र गुरुङको सम्पादन रहेको छ । सिनेमाको टिजर साहिल खानले तयार गरेका हुन् । आगामी भदौ ६ मा नेपालसँगै विदेशमा प्रदर्शन हुने तयारी भइरहेको ‘माग्ने राजा’ लाई आरआर फिल्मले वितरण गर्दैछ ।
