शैली गसिप । गत जेठ २ मा एउटा फिल्म रिलिज भएको थियो, ‘हेल्लो काँशीराम’ । पहिलो दिन देशभर ४५ शो पाएको यस फिल्म कतिले हेर्नुभयो ? हेर्नुभयो भने त तपाई भाग्यमानी १०४ जनाभित्रै पर्नुभएछ । किनभने यो फिल्मलाई देशभरका हलबाट मात्र १०४ जनाले टिकट काटेर हेरेका थिए ।
दिलिप रायमाझीको मुख्य भूमिका रहेको ‘हेल्लो काँशीराम’ को पोष्टरमा पनि उनी सोलो अटाएका थिए । सोलो त के भन्नु ? उनको काँधमा सवार थियो, एउटा जख्खड बोका पनि । पोष्टरमा अटाएका थिए, बोका र दिलिप मात्र ! डेढ करोडको लगानीमा बनाइएको भनिएको उक्त फिल्मले ग्रस कलेक्सन गरेको रकम भने २५ हजार ५३५ रुपैयाँ हो । यसमा पनि १३ प्रतिशत कर र ४ प्रतिशत स्थानीय कर कटाएर बाँकी आउने रकमको ५० प्रतिशत हिस्सा हललाई बुझाउनु पर्छ भने त्यसबाट आउने रकमको १० देखि १५ प्रतिशत वितरकलाई बुझाएपछि मात्र बाँकी रहेको रकम निर्माताको खल्तीमा जान्छ ।
फिल्मले २५ हजारको टिकट बेचेको भएपनि ‘हेल्लो काँशीराम’ का निर्माता पीबी थापाले भने हलबाट कुल ९ हजार ५३७ (वितरकलाई १० प्रतिशत छुट्याउँदा) कमाएको देखिन्छ । तर यसै रकमबाट फिल्म चलाउँदा देशभरका हलमा डिजिटल फाइल पु¥याउनका लागि लाग्ने सर्भर चार्ज पनि निर्माताले तिर्नुपर्छ ।
२०७६ साउनमा नै २५ दिनको सेड्यूअलसहित छायांकनमा गएको यस कमेडी जनराको फिल्मको लेखन तथा निर्देशन रीम विश्वकर्माले गरेका हुन् । दिलिपको जोडीको रुपमा नवज्योती रसाइली रहेको फिल्ममा प्रियंका कार्कीले समेत अतिथि भूमिका निर्वाह गरेकी थिइन् । त्यसबाहेक सुरविर पण्डित, रामचन्द्र अधिकारी, सुशील पोखरेल, उमेश राई (फुलन्देकी आमा), अर्जुन गुरुङ (भंगेरी डन) लगायत कलाकार पनि थिए । तर फिल्मले कलाकारको पारिश्रमिकको त कुरै छोडौं, पोष्टरमा दिलिपले बोकेको बोकाको पैसा पनि उठाउन सकेन ।
रमाइलो त के भने, ‘हेल्लो काँशीराम’ रिलिजको ४ दिनअघि मात्रै रीम विश्वकर्माकै लेखन तथा निर्देशनमा अर्को फिल्म ‘राजकुमारी’ पनि बनाउने घोषणा गरेका थिए, निर्माता पीबी थापाले । रीको ड्रिम प्रोजेक्ट भनेर प्रचार गरिएको उक्त फिल्मलाई निर्माता थापाले पाँच करोडको लगानीमा बनाउने पनि उद्घोष गरेका थिए । यतिबेला ‘राजकुमारी’ को निर्माणको चहलपहल त केही सुनिएको छैन, अब बनाईहाले भने पनि जानाजानी पैसा डुबाउने निर्मातालाई त के नै भन्न सकिन्छ र ?
