कलाशैली संवाददाता । ६ दशकअघि २०२३ पुष १ मा रिलिज भएको बीएस थापा निर्देशित फिल्म ‘माइतीघर’ को शीर्ष गीत ‘बसन्त नै बस्न खोज्छ यहाँ लोलाएर, यो हो मेरो प्राण भन्दा प्यारो माइतीघर’ आज पर्यन्त कालजयी छ । किरण खरेलको शब्दमा जयदेवले संगीत भरेको उक्त गीतलाई भारतीय गायिका आशा भोषलेले गाएकी थिइन् । सोही गीतलाई यतिबेला निर्माता रोहित अधिकारीले आफ्नो फिल्ममा पुनः प्रयोग गरेका छन् ।

‘माइतीघर’ नै नाम राखेर यतिबेला फिल्मको छायांकनमा व्यस्त रहेका निर्माता अधिकारीले उक्त गीतलाई पुनः प्रयोग गर्न लागेको बताएका हुन् । यसपटक भने गीतलाई सञ्जिवनीले गाएकी छन् भने फिल्मका शीर्ष नायिका उपासना सिंह ठकुरी र श्यामश्री शेर्पाले यस गीतमा नाचेका छन् । हालै मात्र यस गीतको छायांकन बाग्लुङको कालिका मन्दिरमा गरिएको निर्माता अधिकारीले जानकारी दिए ।

गीतको भिडियोमा नायिकाद्वयलाई ५० बढी कोरसले साथ दिएका छन् । गीतको नृत्य निर्देशन कमल राइले गरेका हुन् । मिलन तामाङदे निर्देशन गरिरहेको ‘माइतीघर’लाई दशैंको फूलपातिबाट रिलिज गर्ने घोषणा गरिएको छ । फिल्मलाई उत्कृष्ट बनाउन कुनै पनि कसर बाँकी नराखिएको निर्माणपक्षको दाबी छ ।

सुसन प्रजापतिको छायांकन रहेको फिल्ममा रोहित अधिकारी, रविन शेरचन र धीरज तामाङको लगानी छ । फिल्मका कार्यकारी निर्माता ईश्वर श्रेष्ठ र निरज कटुवाल हुन् । फिल्ममा केदार घिमिरे, धिरज मगर, प्रकाश सपुत, उपासना सिंह ठकुरी, श्यामश्री शेर्पा, युवराज लामा, वुद्दि तामाङ, शिशिर वाङ्देल लगायतका कलाकारहरुको अभिनय छ । यस फिल्मको छायांकन म्याग्दीको ताकम गाउँ र धारापानी गाउँमा गरिएको छ ।