कलाशैली संवाददाता । डिज्नीको लाइभ–एक्सन रिमेक ‘लिलो एन्ड स्टिच’ र टम क्रूजको सम्भवतः फाइनल मिशनः इम्पोसिबल फिल्म ‘मिशनः इम्पोसिबल – द फाइनल रेकनिङ’ ले विश्वव्यापी बक्स अफिसमा रेकर्ड तोड्दै वर्षकै ठूला फिल्महरूको रूपमा उद्घाटन गरेका छन् ।
सन् २००२ मा निकै रुचाइएको एनिमेटेड फ्यामिली फिल्म ‘लिलो एन्ड स्टिच’ को रिमेकले विश्वभर ४३४१ मिलियन (लगभग ४५ अर्ब नेपाली रूपैयाँ) को कमाई गर्दै अपेक्षा भन्दा उत्कृष्ट प्रदर्शन गरेको छ । यो कमाईले यसलाई सन् २०२५ को दोस्रो ठूलो ओपनिङ गर्ने फिल्म बनाएको छ, जुन ‘ए माइनक्राफ्ट मुभी’ पछि हो । साथै, यो फिल्मले अमेरिकामा मेमोरियल डे सप्ताहन्तको बक्स अफिस रेकर्ड पनि तोडेको जनाइएको छ ।
यसैगरी, टम क्रूजको मिशनः इम्पोसिबल सिरिजको आठौँ फिल्म ‘मिशनः इम्पोसिबल – द फाइनल रेकनिङ’ ले पनि ४१९० मिलियन (लगभग २५ अर्ब नेपाली रूपैयाँ) को टिकट बिक्रीसहित उत्कृष्ट प्रदर्शन गरेको छ । सन् १९९६ देखि एजेन्ट इथान हन्टको भूमिका निर्वाह गर्दै आएका क्रूजले यो फिल्म सिरिजको अन्तिम भएको पुष्टि गरेका छन्, ‘यो अन्तिम हो ! यसलाई ‘फाइनल’ भनिएको बेकार होइन ।’ तर, केहीले भने यो साँच्चै अन्तिम हुनेमा शंका व्यक्त गरेका छन् ।
यो ब्लकबस्टर फिल्मले मिश्रित समीक्षा प्राप्त गरेको छ । द गार्जियनले यसलाई ‘रोमाञ्चक र मनोरञ्जनात्मक साहसिक’ भन्दै पूर्णांक (पाँच तारा) दिएको छ, भने भ्यानिटी फेयरले यसलाई ‘विदाईका लागि योग्य’ भन्दै टिप्पणी गरेको छ । हलिउड रिपोर्टरले त अझ ‘निराशाजनक बिदाइ’ भनेको छ, र म्याशेबलले सिरिज ‘टेप डेकमा आत्म–विनाश हुने सन्देशको फुस्स फुस्किएको अन्त्य’ भनी तीखो टिप्पणी गरेको छ ।
यता, ‘लिलो एन्ड स्टिच’ डिज्नीको प्रिय एनिमेटेड फिल्महरूको लाइभ–एक्सन रिमेकको लामो शृंखलाको पछिल्लो इन्स्टलमेन्ट हो । यो फिल्मले सन् २०१९ को ‘द लायन किंग’ र सन् २०१७ को ‘ब्यूटी एन्ड द बिस्ट’ पछिको तेस्रो उत्कृष्ट बक्स अफिस ओपनिङ हासिल गरेको जनाइएको छ । यो नयाँ संस्करणमा कर्टनी बी. भान्स, ज्याक ग्यालिफियानाकिस र आठ वर्षीया माइया केआलोहा मुख्य भूमिकामा छन्, साथै कम्प्युटर–जनरेटेड प्यारा एलियन पनि समावेश छ ।
यो फिल्मले पनि मिश्रित समीक्षा प्राप्त गरेको छ । डेली बिस्टले यसलाई ‘हँसिलो, रमाइलो र मिठासपूर्ण’ भनेको छ, तर द टाइम्सले यसलाई ‘दिमाग सनन्न पार्ने घृणित’ को रूपमा व्याख्या गरेको छ ।
