कलाशैली संवाददाता । शुक्रबारदेखि नेपालका सिनेमाहलमा चार नयाँ फिल्म प्रदर्शनमा आउँदैछन् । राजेश हमालको आठ वर्षपछिको पुनरागमन फिल्म ‘नरसिंहा अवतार’, हलिउडको ‘मिसन इम्पोसिबल: द फाइनल रेकोनिङ’, डिज्नीको ‘लिलो एन्ड स्टिच’ र बलिउडको ‘भूलचुक माफ’ ले दर्शकको ध्यान तान्ने अपेक्षा गरिएको छ । योसँगै तेस्रो हप्तामा प्रवेश गरेको ‘ऊनको स्वीटर’ को दबदबा कायमै छ ।
दिवाकर भट्टराई निर्देशित ‘नरसिंहा अवतार’ ले देशभर १ सय ३३ शो पाएको छ। राजेश हमाल, राज कटुवाल, नीति शाह, सनिषा भट्टराई, सरोज खनाल, नीर शाहलगायतका कलाकारको अभिनय रहेको यो फिल्मको अग्रिम बुकिङ मंगलबारदेखि खुला भएको थियो । चन्द्र पन्तको कथा, राजु तामाङको एक्सन, कविराज गहतराजको कोरियोग्राफी र समीर मियाको भिएफएक्सले यो फिल्म भव्य बनेको छ ।
टम क्रुजको ‘मिसन इम्पोसिबल: द फाइनल रेकोनिङ’ ले १ सय २५ शो पाएको छ। यो सिरिजको अन्तिम कडीले विश्वभर चर्चा कमाएको छ। यस्तै, राजकुमार रावको ‘भूलचुक माफ’ ले ८६ र ‘लिलो एन्ड स्टिच’ ले २६ शो पाएका छन्। गत हप्ता रिलिज भएको ‘के घर के डेरा’ ले १९ शो पाएको छ भने ‘फाइनल डेस्टिनेसन: ब्लडलाइन्स’, ‘रेड २’, ‘थन्डरबोल्ट्स’, ‘पिताम्बर’, ‘अञ्जिला’ र ‘लाज शरणम्’ पनि प्रदर्शनरत छन् ।
नवीन चौहान निर्देशित ‘ऊनको स्वीटर’ ले तेस्रो हप्तामा १ सय १२ शो पाएर बलियो व्यापार गरिरहेको छ । विपिन कार्की, मिरुना मगर, परीक्षा लिम्बुलगायतको अभिनय रहेको फिल्मलाई दर्शकले रुचाएका छन् । नेपाली, हलिउड र बलिउडको यो विविधताले दर्शकलाई फरक स्वाद प्रदान गर्नेछ ।
