कलाशैली संवाददाता । आगामी जेठ १५ गते रिलिज हुने फिल्म ‘महाभोज’ को ट्रेलर आइतबार काठमाडौंको क्युएफएक्स सिनेमा राइजिङ मलमा सार्वजनिक गरिएको छ। करिब साढे चार मिनेटको ट्रेलरले सहकारी संस्थाको ठगीमा परेका पीडितहरूको मार्मिक कथालाई उजागर गरेको छ । ट्रेलरमा दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, गौमाया गुरुङ, वसुन्धरा भुसाल र मोहन निरौलालगायतका कलाकारहरूको दमदार अभिनय देखिन्छ।
सहकारीमा जम्मा गरेको रकम फिर्ता नहुँदा औषधि नपाएर ज्यान गुमाउनेहरूको त्रासदी, जागिरे कर्मचारीको मनोवेदना र राजनीतिक चलखेलको दम्भ ट्रेलरमा झल्किन्छ। सामाजिक असमानता र सहकारीको रकम दुरुपयोग गरी विलासी जीवन जिउनेहरूको कथानकलाई ट्रेलरले साहसिक रूपमा प्रस्तुत गरेको छ ।
ट्रेलरको अन्त्यमा ‘सत्य कहिल्यै लुक्दैन’ लेखिएको दृश्यले फिल्मको सत्य खोज्ने प्रतिबद्धतालाई संकेत गर्छ। केही दिनअघि कलाकारहरूले सामाजिक सञ्जालमा यो वाक्यांश पोस्ट गरी दर्शकमा उत्सुकता जगाएका थिए।
निर्देशक दिनेश राउतले समारोहमा भने,‘यो फिल्म सहकारी ठगीको कथा मात्र होइन, समाजमा माथिल्लो तहका व्यक्तिहरूले तल्लो तहका मानिसलाई प्रयोग गरी विलासी जीवन जिउने प्रवृत्तिको चित्रण हो।’
निर्माता हिमाल कडरियाले थपे,‘हाम्रो समाजले उत्पादन गरेको कथालाई पर्दामा उतार्नु आवश्यक थियो, त्यसैबाट ‘महाभोज’ जन्मिएको हो।’ विकास सुवेदीको कथा र पटकथामा बनेको यो फिल्म क्लकवर्क क्रियशन र पिक्चर फ्रेमले निर्माण गरेका हुन् । समसामयिक विषयवस्तु र सशक्त कथानकका कारण ‘महाभोज’ले दर्शकको ध्यान खिच्ने अपेक्षा गरिएको छ ।
