कलाशैली संवाददाता । अभिनेत्री मिरुना मगरको डेब्यु फिल्म ‘लालपुर्जा’ मा अभिनेता विपिन कार्की पनि थिए । तर, उक्त फिल्ममा यी दुईले स्क्रीन सेयर गर्न पाएनन् । तर, मिरुना विपिनको कामदेखि ‘इम्प्रेस’ थिइन् । लगातार सफलताको उकालो यात्रामा रहेको मिरुनालाई विपिनसँग काम गर्ने इच्छा नै थियो । तर, यो पुरा हुन् सकेको थिएन । अन्तत: आर्टमान्डूका लागि नवीन चौहानले फिल्म ‘ऊनको स्वीटर’ निर्देशन गर्ने सोच बनाएपछि मिरुनालाई त्यो मौका जुर्यो । फिल्ममा मिरुना ‘फूल’ बनेकी छिन् भने विपिन ‘धरणीधर’ को पात्रमा छन् ।

‘म विपिन दाइको कामदेखि निकै प्रभावित थिएँ । तर, बल्लसँगै स्क्रीन सेयर गर्न पाएँकी छु । यसमा हामी जोडीकै रुपमा प्रस्तुत छौँ, यसले पनि उहाँको अभिनयको विविध आयामलाई बुझ्ने मौका पाएँ । उहाँले पात्रलाई अपनाउन गर्ने मेहनतले मैले पनि केही सिकेकी छु’, मिरुनाले भनिन् ।

फिल्ममा ‘गुरुङसेनी’ युवतीको भूमिकामा मिरुना छिन् भने विपिनले ‘काफ्ले ब्राह्मण’ युवक भूमिका निर्वाह गरेका छन् । यी दुई बीचको प्रेम सम्बन्धमा आउने जातीय अन्तर्विरोधको कथा फिल्ममा समेटिएको छ । फिल्ममा परीक्षा लिम्बू, विल्सनविक्रम राई, सुनिल पोखरेल, माओत्से गुरुङ, प्रेम सुब्बालगायतका कलाकारले पनि अभिनय गरेका छन् ।

तस्बिरहरू : कुवेर डंगोल